د جنوب غرب زون د قضائي تفتیش یوه پلاوي د غور ولایت له شپږو ولسوالیو لیدنه وکړه
د جنوب غرب زون د تمیز ریاست او د سترې محکمي د قضائي معاونیت د محترم مقام د هدایت په اساس د جنوب غرب زون د قضائي پلټنې عمومي ریاست د خپل تفتیشي پلان له مخې د یاد ریاست د قضائي پلټونکو څخه جوړ پنځه کسیز پلاوي چې په ترکیب کې یې د جنوب غرب زون د قضائي تفتیش معاون شتون درلود د روان ۱۴۴۵ هـ ق کال د صفرالمظفر میاشتې په ۲۴مه نېټه غور ولایت ته سفر وکړ.
د قضائي تفتیش دغه پلاوي لومړی د غور ولایت د مرافعه محکمې له رئیس سره د هغه په کاري دفتر کې وکتل او د محاکمو د معمولي مشکلاتو او د محاکمو د پرمختګ په اړه یې ورسره هراړخیزې خبرې وکړي؛ وروسته یې د محاکمو د تېرو فعالیتونو د څېړنې او بررسۍ په موخه د خپل کاري پلان له مخې د صفرالمظفر میاشتې په ۲۵مه نېټه د یاد ولایت ولسوالیو ته سفر وکړ.
د جنوب غرب زون د تمیز ریاست د قضائي تفتیش دغه پلاوي د خپل سفر په جریان کې د غور ولایت د الله یار، الفاروق، چهارسدې، مرغاب، لعل و سرجنګل او دولت یار ولسوالیو له ابتدائیه محاکمو څخه لیدنه وکړه.
د قضائي تفتیش یاد پلاوي د غور د ابتدائیه محاکمو څخه د لیدنې پر مهال د یادو محاکمو لخوا صادرې شوې فیصلې بررسي او په دقت مطالعه کړې او د شرعي فیصلو د صادرولو په اړه یې د محاکمو مسؤولینو ته لازمې لارښوونې وکړې.
وروسته یې د یادو محاکمو ملاحظات د هرې محکمې د قضائي پلاوي سره په احسنه طریقه شریک کړل او له محاکمو څخه یې د وضاحت غوښتلو د طرزالعمل مطابق د یادې هرې ولسوالۍ د قضائي پلاوي څخه پوښتنې وکړې.
په دې سربېره دغه پلاوي د خپلې کاري لایحې مطابق د یادو ټولو ابتدائیه محاکمو د عریضو د ثبت، د حقوقي دوسیو د ثبت، د جزائي دوسیو د ثبت، وارده او صادره، د رسیداتو کتاب، د حاضرۍ کتاب او درې میاشتنی راپور بررسي او مطالعه کړل او په دې برخه کې یې ورته لازم هدایات وکړل.
وروسته یاد پلاوي د رایو په اتفاق د یادې هرې محکمې د فیصلو د صحت او سقم فیصدي معلومه کړه.
دغه راز د قضائي تفتیش پلاوي د بندیانو د وضعیت د څېړلو په موخه د یادې هرې ولسوالۍ له محبس څخه لیدنه وکړه، د هرې ولسوالۍ د ټولو محبوسینو بشپړ شهرت او وضعیت یې له ځان سره نوټ او بیا یې له اړوند محکمې سره شریک کړی.
پر دې سربېره یاد پلاوي د هرې ولسوالۍ له قومي مشرانو او علماء کرامو سره جلا، جلا ناستې وکړې او د محاکمو د فعالیتونو په اړه یې د هغوی نظر او معلومات واخیستل.
وروسته د جنوب غرب زون د قضائي تفتیش عمومي ریاست پلاوي د یادې هرې ولسوالۍ د مسؤولینو لکه: ولسوال صاحب، امنیه قوماندان صاحب او د استخباراتو له مدیر سره وکتل، له یادو مسؤولینو څخه یې د مربوطه محکمې په اړه معلومات وغوښتل او د محاکمو د فعالیتونو د لاښه پرمختګ او د ځینو ستونزو د حل په اړه یې د هغوی نظرونه واورېدل.
