د تخار د ښاري محکمې نوى رئیس په رسمي توګه معرفي شو
د رستاق ولسوالۍ د ابتدائیه محکمې پخوانی رئیس محترم شیخ عبدالحمید (متوکل) د اسلامي امارت د سترې محکمې عالي مقام د لزوم دید له مخې د شنبې په ورځ (د ۱۴۴۴ هـ ق کال د ربیع الاول په ۲۵ مه) نېټه د مرافعه محکمې د رئیس محترم الحاج مولوي محمد صابر (حنفي) لخوا د تخار ښاري محکمې د رئیس په توګه د یادې محکمې کارکونکو ته ور وپېژندل شو او په رسمي توګه یې خپله دنده پیل کړه.
د تخار ښاري محکمې د رئیس د معرفي کولو مراسم لومړی د قرانکریم د څو مبارکو آیاتونو په تلاوت سره پیل شول؛ ورپسې د تخار د مرافعه محکمې رئیس محترم الحاج مولوي محمد صابر (حنفي) د قضاء مقام د اهمیت په اړه خبرې وکړې او وویل، د قضاء دنده امتیاز نه بلکې دا یو لوی او دروند مسؤولیت دی؛ نو موږ ته لازمه ده چې د شرعي قضيو حل او فصل برخه کې دغه ستر مسؤوليت د اسلامي شريعت د احکامو او د اسلامي امارت د اصولو او مقرراتو په نظر کې نيولو سره اداء او په ښه ډول عدالت تأمین کړو.
دغه راز نوموړي ټینګار وکړ چې قاضي باید د خپلې دندې په ترسره کولو کې پرهېزګاري وکړي، په ټینګ عزم او اراده د خلق الله خدمت وکړي، حاضرۍ ته پابند او له مدعیانو سره ښه چلند وکړي.
د ناستې په وروستیو کې د تخار د ښاري محکمې نوي رئیس محترم شیخ عبدالحمید (متوکل) او د دغې محکمې محترم قضائي پلاوي په اجراآتو کې د شفافیت، د عدالت د تأمین او د واردو شوو قضیو د ښه حل او فصل ډاډ ورکړ.
