د جنوب لوېدیځ زون د تمیز عالي رياست مفتشينو د هرات ولايت له محاکمو او زندانونو څخه ليدنه وکړه
د جنوب لوېدیځ زون د تمیز عالي رياست او د سترې محکمې د قضائي معاونيت د محترم مقام په هدایت د قضائي پلټنې يوه پنځه کسيز پلاوي چې الحاج مفتي محمد (عبدالله)، مفتي محمد اسلام، الحاج مولوي اخترمحمد (نعماني)، الحاج مفتي محمد (عمري) او مولوي عبیدالله په کې د مسلکي غړيو په توګه دنده لرله، د روان ۱۴۴۶ هـ ق کال د ربیع الاول میاشتې په ۱۰مه نېټه د هرات ولایت د محاکمو د تېرو فعالیتونو د څېړنو په موخه ياد ولايت ته سفر وکړ.
د قضائي تفتيش یاد پلاوي د سفر او ليدنې په پیل کې د هرات ولايت د مرافعه او ښاري محاکمو له محترمو رئیسانو سره وکتل، په دې ليدنه کې يې د محاکمو د ظرفيت لوړولو او معیاري کولو په اړه خبرې وکړې.
د ليدنې په دوام ياد پلاوي د خپل کاري پلان له مخې د هرات د مرافعه او ښاري محکمې اړوند دېوانونو، د ولسوالیو د ابتدائیه محاکمو او هرې ولسوالۍ له زندان، د وثایقو آمریت او حقوقو آمریت څخه په جلا جلا ډول لیدنه وکړه.
یاد پلاوي د څارنې بهیر په ترڅ کې د محاکمو د قضائي، اداري او مالي چارو هر اړخیزه پلټنه وکړه، د محاکمو د قضائي او اداري پرسونل د سلوکي او مسلکي اړخونو معلومات يې واخیستل او د چارو د سمون په برخه کې یې ورته لازمې لارښوونې وکړې.
د قضائي تفتیش پلاوي د محاکمو اړوند شته ستونزې، کاري خنډونه او لوژستیکي نیمګړتیاوې له ځان سره وليکل او د ليدنې په وروستيو کې يې د ستونزو د حل، خنډونو د له منځه وړلو، د شته نیمګړتیاوو د اکمال په اړه د هرات مرافعه محکمې د ریاست له مقام سره تفاهمي ناسته وکړه او ځينې ستونزې يې په جلا جلا توګه ورسره شريکې کړې.
دغه پلاوي د څارنې او ليدنې په دوام د یاد ولایت او د ولسوالیو له مسؤولینو، علماء کرامو او قومي مشرانو سره ناستې وکړې او د محاکمو د فعالیتونو د لا ښه پرمختګ او د ځينو اړونده ستونزو د حل په موخه يې د هغوی نظرونه واورېدل.
ياد پلاوي د هرات ولايت د محاکمو په وړاندې د شته ستونزو دقیقه او هر اړخیزه څېړنه وکړه.
د قضائي تفتیش د څارنې او پلټنې پلاوي ياد له لاسته راوړنو ډک سفر د ۱۴۴۶ هـ ق کال د ربیع الثاني مياشتې په (۱۰) مه نېټه پای ته ورسېد.
