د کابل مرافعه محکمې عمومي رئیس د ولسوالیو د ابتدائیه محاکمو له رئیسانو سره غونډه وکړه
د روان ۱۴۴۵ هـ ق کال د جمادی الأولی میاشتې په ۲۷مه نېټه د مرافعه محکمې عمومي رئیس محترم مولوي عبدالشکور (رشاد آخندزاده) په مشرۍ او د کابل ولایت د ټولو ولسوالیو د ابتدائیه محاکمو محترمو رئیسانو په ګډون؛ دوسیو ته په چټکۍ د رسېدنې، په فیصلو کې د شته ستونزو د حل، په ټاکل شوي وخت کې دوسیو ته رسېدنه، وخت په وخت د بندیانو احوال اخیستل او داسې نورو موضوعاتو په اړه د کابل ولایت مرافعه محکمې د مقام په دفتر کې غونډه ترسره شوه.
ياده غونډه د قرآنکریم د څو مبارکو آیاتونو په تلاوت پیل شوه؛ ورپسې محترم مولوي عبدالشکور (رشادآخندزاده) د غونډې ګډونوالو ته ښه راغلاست ووايه، د یاد مجلس پر اهمیت يې خبرې وکړې.
د غونډې په دوام د محاکمو محترمو رئیسانو په اجراآتو کې ځينې پوښتنې او خپل وړاندیزونه د مرافعه محکمې له رئیس سره شریک کړل، چې وروسته د کابل د مرافعه محکمې عمومي رئيس لخوا ورته یادې پوښتنې حل او په اړه یې لازمې لارښوونې وشوې.
یاده غونډه د دعاء په لوستلو سره پای ته ورسېده.
