د فراه ولایت مرافعې محکمې رئيس په مشرۍ اداري غونډه وشوه
د فراه ولایت د مرافعې محکمې عمومي رئیس محترم شیخ غلام رسول (احساني) په مشرۍ؛ د مرافعه محکمې مرستیال مولوي سید مؤمن (ابوالخیر)، د جزا، امنیت عامه، او مدني دېوانونو رئیسانو او غړو په ګډون په ۲۲/ ۱۰/ ۱۴۴۶هـ ق نېټه اداري غونډه وشوه.
غونډه د قرآنکريم د څو مبارکو آیاتونو په تلاوت پیل شوه؛ ورپسې پر يو شمېر موضوعاتو بحث او خبرې وشوې.
په دې غونډه کې په ادارو کې پر اتحاد او يووالي، د هېوادوالو حقوقي او قضائي دوسيو ته پر وخت رسېدنه او حاضرۍ په پابندۍ باندې ټينګار وشو.
د غونډې په وروستيو کې ګډونوالو د یادو مواردو د تحقق لپاره پوره همغږي وښوده او ژمنه یې وکړه چې د خدماتو د لا ښهوالي په موخه به خپل مسؤولیتونه په امانتدارۍ او صداقت سره ترسره کوي.
