د سترې محکمې د مرکزي تمیز عالي ریاست د جزا دېوان عمومي رئیس د (۸) جزائي دوسیو په اړه د وروستیو څېړنو د بشپړولو په موخه درېیو ولایتونو ته رسمي سفر وکړ

د سترې محکمې د مرکزي تمیز عالي ریاست د جزا دېوان عمومي رئیس محترم مفتي عتیق الله (دروېش)، د مفتي محمد (حصین) او مفتي عبدالرحمن (مفتي‌زاده) په ملتیا، د ۱۴۴۸هـ ق کال د جمادی الأولی میاشتې په ۱۴مه، ۱۵مه او ۱۶مه نېټه، د (۸) جزائي دوسیو په اړه د وروستیو تحقیقاتو بشپړولو په موخه لغمان، کونړ او ننګرهار ولایتونو ته رسمي سفر وکړ.
د جزا دېوان عمومي ریاست پلاوي د دغه سفر په ترڅ کې د یادو ولایتونو د مرافعه محاکمو له مسئولینو او قضائي منسوبینو سره وکتل؛ د جزائي قضیو د حل او فصل او د قضائي اجراآتو د لا ښه‌والي په اړه یې ورسره مفصلې خبرې او بحثونه وکړل.
همدارنګه، د جزا دېوان عمومي رئیس او ورسره مل پلاوي په دغه سفر کې، د جزائي موضوعاتو اړوند (۸) دوسیې وڅېړلې، د دوسیو له طرفینو سره یې لیدنې وکړې، د قضیو د بشپړې ارزونې په موخه یې ترې لازم تحقیقات وکړل او هغوی ته یې د سولې ترغیب ورکړ.
د یادو دوسیو له ډلې، په لغمان او کونړ ولایتونو کې د دوو دوسیو طرفینو د سترې محکمې د دغه لوړ پوړي پلاوي په ترغیب، په خپله خوښه او رضاء سره سولې ته غاړه کېښوده او اړوند موضوعات یې د وروستي حل او اصلاحي پرېکړې په موخه مصلحینو ته راجع شول.
په دې سربېره محترم مفتي عتیق الله (دروېش) او ورسره مل پلاوي د یاد سفر پر مهال د کونړ له والي محترم مولوي قدرت الله (ابو حمزه) سره هم وکتل، له محاکمو سره د کونړ ولایت مقام همکاري او همغږي یې وستایله او له نوموړي یې په دې برخه کې د غوره همکارۍ له امله مننه وکړه.
د کونړ والي محترم مولوي قدرت الله (ابو حمزه) د سترې محکمې دغه لوړ رتبه پلاوي ته ډاډ ورکړ، چې ټولو ولایتي ادارې د تل په څېر له محاکمو سره هر ډول اصولي همکارۍ ته ژمنې دي او په دې برخه کې به لا ډېرې هڅې وکړي.
د لغمان، کونړ او ننګرهار ولایتونو د مرافعه محاکمو رئیسانو، قضائي منسوبینو او د دوسیو طرفینو د سترې محکمې د مرکزي تمیز عالي ریاست د جزا دېوان عمومي رئیس او ورسره مل پلاوي د سفر هرکلی وکړ او وویل، د سترې محکمې د مسئولینو دغه ډول سفرونه د قضائي چارو د لا ښه تنظیم، د محاکمو د ورځنیو اجراآتو د پیاوړتیا، د قضائي ستونزو د ارزونې او د جزائي موضوعاتو د پر وخت او وروستي حل په برخه کې مهم او اغېزناک تمامېږي.
د یادونې وړ ده، چې د سترې محکمې د مرکزي تمیز عالي ریاست د جزا دېوان عمومي رئیس له دې مخکې هم د ملک ډېری ولایتونو ته د جزائي موضوعاتو په اړه د وروستیو تحقیقاتو د بشپړولو، د جزائي موضوعاتو له طرفینو سره د لیدنو او له هغوی څخه د لازمو تحقیقاتو په موخه سفرونه کړي دي.