په لوګر ولایت کې د قضائي او امنیتي ارګانونو تر مینځ د همغږۍ میاشتنۍ غونډه ترسره شوه
په ۱۹ /۸ /۱۴۴۴ هـ ق نېټه د لوګر ولایت مقام په ریاست کې د لوګر د قضائي، عدلي او امنیتي ادارو د مسؤولینو ترمنځ د همغږۍ د تقویې په موخه میاشتنۍ ناسته ترسره شوه .
یاده ناسته چې د لوګر والي محترم مولوي قدرت الله (امیني)، د استیناف محکمې رئیس محترم مولوي روح الله (عبدالسلام)، امنیه قومندان محترم مولوي محمد انشأ (مخبت)، د لوګر ولایت د استخباراتو رئیس محترم مولوي شاهین، د لوګر ولایت مقام د دفتر رئیس محترم مولوي میرویس، د منصوري قول اردو د څلورمې پلې لیوا قومندان، د قطعه خاص قومندان، د تروریزم او کشف مدیرانو او یو شمېر نورو ځایي مسؤولینو په کې ګډون کړی و، د قرآنکریم په تلاوت سره پیل شوه.
ورپسې د لوګر ولایت د دفتر رئیس مولوي میرویس د دې غونډې په موخو او اهدافو وغږیده.
وروسته د لوګر ولایت د استیناف محکمې رئیس محترم مولوي روح الله عبدالسلام د مجلس حاضرینو ته د ادارو تر مینځ د همکارۍ او همغږۍ په ګټو هر اړخیزه رڼا واچوله.
نوموړي وویل، قضائیه او اجرائیه قوې د هر نظام له اساساتو څخه دي، موږ ټول د يوې ونې ښاخونه یو چې هر یو له موږ څخه د الله عزوجل، نظام او ولس پر وړاندې تر خپلې اندازې مسؤول او مکلف یو، یو طرف ته که د یوه مجرم تعقیب، کشف او نیول د امنیتي ادارو مسؤولیت دی بلخوا د همدغه مجرمینو د جرم اثبات او دوی ته د سزا ورکول د محاکمو کار او دنده ده.
د لوګر د استیناف محکمې رئیس زیاته کړه، د الله عزوجل د قانون، اسلامي نظام او جامعې پر وړاندې هر مجرم باید د عدالت میز ته راکش کړل شي، په ټولو باید یو ډول عدالت پلی شي او د اسلامي عدالت په پلي کولو کې باید د هېچا پروا ونه ساتل شي.
ورپسې د لوګر ولایت د امنیتي ادرارو او د لوګر د قضائي پلاوي ترمنځ د قضائي او امنیتي ادارو په مشترکو موضوعاتو، د ستونزو پر حل او مشکلاتو ته د رسېدنې په لارو چارو پراخ بحث وشو.
په پای کې د لوګر والي محترم مولوي قدرت الله امیني د مجلس حاضرینو ته وینا وکړه.
نوموړي د لوګر د امنیتي ادارو له مسؤولینو څخه د لوګر د استیناف محکمې سره پر لا او زیاتې همکارۍ ټینګار وکړ، د ناستې له ګډونوالو د مننې ترڅنګ یې د یادو غونډو د دوام غوښتنه وکړه.
