د ننګرهار د مرافعه او ښاري محاکمو د دېوانونو د رئیسانو ترمنځ غونډه ترسره شوه
د ۱۴۴۴کال د شعبان په ۲۹مه نېټه د ننګرهار ولایت په مرافعه محکمه کې د مرافعه محکمې د رئيس محترم شیخ محمدګلاب (فاروقي) ترمشرۍ لاندې د مرافعه او ښاري محاکمو د دېوانونو د رئیسانو او د دغه ولایت د زندانونو چارو د رئیس ترمنځ غونډه ترسره شوه.
غونډه د قرانکریم د څو مبارکو آیاتونو په تلاوت پیل شوه؛ ورپسې د مرافعه محکمې رئیس د غونډې پر اهمیت خبرې وکړې او دېوانونو رئیسان یې خپلو مسؤولیتونو ته متوجه کړل.
د مرافعه محکمې رئیس د ځینو ضروري هدایاتو ترڅنګ لارښوونه وکړه چې د روژې د مبارکې میاشتې په رارسېدو سره د بندیانو دوسیې عاجلې اجرأ او وڅېړل شي، د کومو بندیانو جرمونه چې خفیف وي دوسیې یې دې عاجلې وڅېړل شي او د رمضان د مبارکې میاشتې په احترام دې د هغوی د خوشي کېدو اقدام وکړي.
دغه راز یې د تحریراتو رئیس ته لارښوونه وکړه چې کومو دېوانونو کې کاري حجم زیات وي دولسوالیو څخه دې ورته مفتي صاحبان او محررین د خدمتي په توګه ورکړي ترڅو یې کارونه چټک او زموږ دګرانو هېواد والو دوسیو ته په ټاکلي وخت رسېدنه وشي.
غونډه د مرافعه محکمې د رئیس به دعاسره پای ته ورسیده.
