د میدان وردګ ولایت د مرافعه محکمې د رئیس په مشرۍ اداري ناسته ترسره شوه
د روان ۱۴۴۴ هجري قمري کال د شوال المکرم میاشتې په ۱۴مه نېټه د میدان وردګ ولایت د مرافعه محکمې په ریاست کې د یادې محکمې د رئيس ښاغلي مولوي عبدالکریم (حقاني) ترمشرۍ لاندې د ستونزو د حل او همغږۍ د لاډېرښت په موخه اداري غونډه ترسره شوه.
یاده غونډه چې د مرافعه محکمې د دېوانونو سربېره د ښاري ابتدائیه محکمې ټولو مسؤولینو په کې ګډون درلود، د قرآنکریم د څو مبارکو آیاتونو په تلاوت پیل شوه.
ورپسې د مرافعه محکمې رئیس د موضوع په اړه هر اړخیزه وینا وکړه، د غونډې ګډونوالو ته یې د ۱۴۴۴هـ ق کال د ۳۶،۲۶ او ۴۲ ګڼو متحدالمآلونو په تطبیق او د کارونو په چټکتیا ټینګار وکړ.
پر دې سربېره د مرافعه محکمې رئیس د ناستې ګډونوالو ته له مراجعینو سره د ښه سلوک سپارښتنه وکړه.
یاده غونډه د دعاء په ویلو سره پای ته ورسېده.
