د لوړو زده کړو وزارت اړوند تخصصاتو ادارې د«عبدالله بن مسعود رضی الله تعالی عنه جامعې» د دوهم کال متخصصینو ته د سترې محکمې د قضائي زده کړو عمومي ریاست لخوا قضائي علمي سیمینار ورکړل شو
د روان ۱۴۴۵ هـ ق کال د ربیع الثاني میاشتې په ۱۷مه نېټه د لوړو زده کړو د تخصصاتو ادارې د عبدالله بن مسعود رضی الله تعالی عنه جامعې د دوهم کال متخصصینو ته چې شمېر یې (۱۲۶) کسانو ته رسېده د سترې محکمې د قضائي تعلیماتو ریاست له لوري نهه ورځنی علمي، تربیتي او قضائي سیمینار ورکړل شو.
په دغه قضائي سیمینار کې ګډونوالو ته په نظري او عملي قضائي درسونو سربېره د یو شمېر مهمو اداري کارونو برخه کې هم روزنه ورکړل شوه.
د یاد قضائي علمي سیمینار په پای غونډه کې چې تېره پنجشنبه (۲۵/۴/۱۴۴۵ هـ ق) نېټه د عبدالله بن مسعود رضی الله تعالی عنه جامعه کې جوړه شوې وه د لوړو زده کړو وزیر محترم شیخ ندامحمد (ندیم) صاحب، د لوړو زده کړو وزارت د محصلینو چارو معین محترم مفتي محمد طاهر احمد صاحب او نورو لوړ پوړو مسؤولینو ګډون درلود.
یادې غونډې ته د لوړو زده کړو وزیر محترم شیخ ندامحمد (ندیم) صاحب، د سترې محکمې د قضائي زده کړو عمومي رئیس محترم مولوي عبدالرحمن (غزنوي)، د لوړو زده کړو وزارت د محصیلنو چارو معین محترم مفتي محمد طاهر (احمد)، او د تخصصاتو ریاست رئیس محترم مفتي احسان الله (احسان) صاحب د قضاء او افتاء پر اهمیت، په اسلامي نظام کې د متخصصینو پر ارزښت او اړتیا، د اسلامي نظام او دغه راز عدالت د ارزښت په تړاو مهمې ویناوې وکړې.
دغه راز د لوړو زده کړو محترم وزیر او د یاد وزارت د محصلینو چارو معین غوښتنه وکړه چې دغه ډول سیمینارونه باید دوامداره او وخت یې ډېر کړل شي؛ ترڅو علماء کرام ترې ډېره ګټه واخلي.
د پروګرام په پای کې د تخصصاتو د ادارې له لوري د سترې محکمې د قضائي تعلیماتو عمومي ریاست استادانو ته مننلیکونه هم ورکړل شول.
