د زابل د مرافعه محکمې عمومي رئیس د سیوري ولسوالۍ له ابتدائیه محکمې څخه لیدنه وکړه
د ۱۴۴۵ هـ ق کال د رجب المرجب میاشتې په ۱۲مه نېټه د زابل ولایت د مرافعه محکمې عمومي رئیس محترم مفتي عبدالجلیل (سفیان) د یوه قضائي پلاوي په ملتیا د همدې ولایت د سیوري ولسوالۍ له ابتدائیه محکمې څخه لیدنه وکړه.
نوموړي د لیدنې په پیل کې د سیوري د ابتدائیه محکمې له رئیس او قضائي هیئت سره ناسته وکړه او د هیئتۍ په تړاو یې د تمیز عالي مقام هدایت (باید د چارو د لا ښه سمون لپاره له ابتدائیه محاکمو څخه وخت پر وخت لیدنه وشي) ورسره شریک کړ.
ورپسې یاد پلاوي د سترې محکمې د دعوت و ارشاد څانګې د هدایت سره سم د سیوري د ابتدائیه محکمې محترم رئیس صاحب ته په محکمه کې د دعوت او ارشاد د کار د پیل کولو په باب سپارښتنې وکړې او د دعوت او ارشاد له لوري ترتیب شوی کتاب او طرزالعمل یې ورته تسلیم کړ.
د سیوري د ابتدائیه محکمې د محترم رئیس لخوا د دې محکمې ضرورتونه له یاد پلاوي سره شریک شول او د یاد پلاوي لخوا ورسره د همکارۍ ژمنه وشوه.
دغه راز یاد پلاوي د محکمې د مربوطه بندیانو په اړه د محکمې له رئیس څخه معلومات وغوښتل چې د محکمې مربوط کوم بندیان موجود نه وو.
وروسته یاد پلاوي د محکمې د اداري او قضائي چارو ارزونه وکړه، د هغوی اړتیاوې یې واورېدې او د همکارۍ ډاډ یې ورکړ.
پر دې سربېره د مرافعه محکمې پلاوي د ابتدائیه محکمې مسؤولینو ته د کارونو د لا ښه سمون او خپل مسؤولیت ته د متوجه کېدو په برخه کې لازمې سپارښتنې وکړې.
ورپسې یاد پلاوي د سیوري ولسوالۍ له مرستیال ولسوال، امنیه قومندان، د استخباراتو له مدیر، د امر بالمعروف له مدیر او د محکمې له غړو سره د همغږۍ ناسته وکړه، د ټولو ادارو ترمینځ د همغږۍ او یو بل ته د همکارۍ په برخه کې یې ورته لازمې سپارښتنې وکړې او د یادو مسؤولینو له لوري ورته د هر ډول همکارۍ ژمنه وشوه.
د سیوري ولسوالۍ مسؤولینو د مرافعه محکمې پلاوي ته د ښه راغلاست ترڅنګ د یاد پلاوي له ورتګ څخه مننه وکړه او ماتحت ادارو ته یې د مسؤولینو ورتګ د کارونو د لا ښه والي لپاره اغېز ناک ګام وباله.
