د هلمند ولایت د مرافعه محکمې د نوي رئيس محترم مفتي عبدالجليل (سفيان) د معرفت غونډه وشوه
د هلمند ولايت د مرافعه محکمې لپاره نوی ټاکل شوی رئيس محترم مفتي عبدالجليل (سفيان)، په ۲۱/ ۱/ ۱۴۴۸هـ ق نېټه د يوې غونډې په ترڅ کې د یادې محکمې قضائي غړو او اداري کارکوونکو ته معرفي او رسمًا یې خپلې چارې پیل کړې.
په دې موخه جوړه شوې غونډه کې د مرافعه محکمې مخکني رئیس، د مرافعه او ښاري ابتدائيه محاکمو د دېوانونو قضائي غړو او اداري کارکوونکو، د جنوب لوېديځ زون د قضائي تفتيش استازي شیخ محمدلعل، د ولایت مقام مرستیال والي الحاج مولوي محمود، د علماوو شورا مرستیال شیخ محمدګل، د پوهنتون رئیس شیخ شریف الله، د کرنې او مالدارۍ رئیس مولوي شېراحمد (رفیع) او نورو علماء کرامو ګډون درلود.
د غونډې په پيل کې مرستیال والي وینا وکړه، تغیر او تبدیل يې د نظام د اصل په توګه ياد کړ، د مخکني رئیس محترم شیخ غلام حضرت (ابوالمنذر) کارونه يې وستایل او نوي رئیس ته يې د همکارۍ ډاډ ورکړ.
ورپسې د مرافعه محکمې د عامه امنيت دېوان رئیس شیخ دوست محمد د اطاعت په اړه وینا وکړه او نوي رئیس ته ښه يې راغلاست ووايه.
دغه راز د علماوو شورا رئيس هم د اسلامي نظام، د نظام ساتنې او خلکو ته په اخلاص د خدمت کولو په اړه خپله وینا ګډونوالو ته وړاندې کړه.
غونډه د دعاء په ویلو پای ته ورسېده.
