د ننګرهار ولايت ښاري ابتدائیه محکمې رئيس د یاد ولايت له زندان څخه ليدنه وکړه
د ننګرهار ولايت ښاري ابتدائیه محکمې رئیس محترم مولوي سلطان محمد (رباني) په مشرۍ؛ د ښاري ابتدائیه محکمې د عامه امنیت دېوان رئیس مولوي ضیاءالحق (عکرمه) او د جزا دېوان رئیس مفتي امین ګلاب (امین) په ملتيا، د ۱۴۴۷هـ ق د ذوالقعدې په ۳۰مه نېټه د ننګرهار ولايت د زندانونو چارو د سمون ریاست څخه لیدنه وکړه.
یاد هيئت په پيل کې د توقیف خونې او ټولو بلاکونو څخه له نږدې لیدنه وکړه، د محبوسینو غوښتنې او ستونزې یې په مستقیم ډول واورېدې او هغوی ته یې ډاډ ورکړ، چې قانوني غوښتنې به یې له اړوندو مسؤولینو سره شریکې او د اصولو سره سم به ورته عاجله رسېدنه وشي.
دغه هيئت د بندیانو د ژوند د شرایطو د ښه کولو او هغوی ته د لازمو اسانتیاوو د برابرولو په موخه د زندانونو چارو د سمون ریاست له رئیس او نورو مسؤولینو سره خبرې وکړې او د هر اړخیزې همکارۍ غوښتنې ترڅنګ يې ورته لازمې سپارښتنې وکړې.
د لیدنې په دوام یاد هيئت د دغه ریاست د کوچنیانو له ځانګړې څانګې څخه لیدنه وکړه؛ د هغوی د درس، روغتیا او استراحت ځایونه يې له نږدې وکتل، الحمدلله په دې برخه کې يې کومې ستونزې نه درلودې.
دغه راز د کوچنیانو د څانګې مسؤولینو ته سپارښتنه وشوه، چې له ماشومانو سره د ښې او انساني رویې ترڅنګ، د هغوی د زده کړو او تعلیم په بهیر کې لا زیات کوښښ او هڅې وکړي.
