د قضائي تفتیش عمومي ریاست مفتشینو د پنجشېر ولایت له محاکمو او مرکزي زندان څخه لیدنه وکړه

د سترې محکمې د محترم عالي مقام په هدایت د قضائي پلټنې د عمومي ریاست یوه مؤظف پلاوي چې محترم مولوي سیف الرحمن (ذاکر) يې مشري کوله او مولوي شمس الدین (احدي) او مولوي کمال الدین (متقي) يې غړيتوب درلود، د روان 1447هـ ق کال د ذوالقعدة الحرام میاشتې په 4مه نېټه پنجشېر ولایت ته د محاکمو د تېرو فعالیتونو د څېړنو په موخه سفر وکړ.
دغه پلاوي په پيل کې د یاد ولایت د مرافعه محکمې له رئيس سره وکتل؛ ورپسې يې د بندیانو د ستونزو د څېړلو په موخه د یاد ولایت له مرکزي زندان (محبس) او توقیف‌خونو څخه لیدنه وکړه او د یاد محبس او توقیف‌خونو اړوند ټولو بندیانو بشپړ شهرت، کیفیت او اړتیاوې يې له ځان سره یادداشت او بیا يې د اړوند محاکمو له مسؤولینو سره شریک کړل.
دغه پلاوي د خپل کاري پلان له مخې د یاد ولایت (7) ولسوالیو د ابتدائیه محاکمو، د حقوقو مدیریتونو، د ښاري او مرافعه محاکمو اړوند دېوانونو، د اسنادو، مخزن، وثایقو او حقوقو آمریتونو څخه جلا جلا لیدنه وکړه.
نوموړي هیئت د پلټنې بهیر په جریان کې د یادو محاکمو د قضائي، اداري او مالي چارو هر اړخیزه پلټنه وکړه، د محاکمو د قضائي او اداري پرسونل د سلوکي او مسلکي اړخونو معلومات يې واخیستل او د چارو د سمون په برخه کې ورته لازمې لارښوونې وشوې.
هیئت د محاکمو اړوند شته ضرورتونه، کاري خنډونه او نېمګړتیاوې له ځان سره یادداشت کړې او په پای کې د اړتیاوو د پوره کولو، د خنډونو له منځه وړلو او د نیمګړتیاوو د اکمال په اړه د یاد ولایت د مرافعه محکمې له مقام سره تفاهمي ناسته وکړه او اړونده مسايل يې په جلا جلا توګه ورسره شریک کړل.
د پلټنې هيئت د خپل سفر په دوام د یاد ولایت د ولسوالیو له ځینو مسؤولینو سره ناستې وکړې او د محاکمو د فعالیتونو د لا ښه پرمختګ او د ځينو اړونده موضوعاتو د حل په موخه یې د هغوی نظرونه واورېدل.
د قضائي تفتیش د پلټنې هیئت یاد له لاسته راوړنو ډک سفر د 1447هـ ق کال د ذوالقعدة الحرام میاشتې په 11مه نېټه پای ته ورسېد.