د محاکمو په قضائي برخه کې د وړ او مسلکي کسانو د جذب په موخه د ملک په کچه له سلګونه علماء کرامو ازموینه واخیستل شوه

د افغانستان اسلامي امارت سترې محکمې اړوند محاکمو په قضائي بستونو کې د وړ او مسلکي کسانو د جذب په موخه له شاوخوا (۳۰۰) علماء کرامو څخه نن چهارشنبې (۲۶/ ۶/ ۱۴۴۷ه ق) نېټه د قضائي زده کړو عمومي ریاست کې تحریري ازموینه واخیستل شوه.

دغه ازموینه د سترې محکمې قضائي مرستیال محترم شیخ محمد قاسم راسخ، د سترې محکمې د دارالانشاء عمومي رئیس محترم مفتي عبدالرشید سعید، د کارکوونکو چارو عمومي رئیس محترم مولوي سیف الله آغا، د قضائي زده کړو عمومي رئیس محترم شیخ قیام الدین قانت، مالي او اداري چارو عمومي رئیس محترم مولوي کریم الله زاهد، د سترې محکمې د اداري معاونیت د دفتر رئیس محترم مولوي عبدالمتین صمیم، د استخدام او سوانحو رئیس محترم مفتي عبدالوارث سعید، د بهرنیو، عامه اړیکو او مطبوعاتو رئیس محترم مولوي عبدالرحیم راشد، د ارزونې او ظرفیت لوړونې رئیس محترم حافظ نصیر احمد صیاد او ګڼ شمېر نورو مسؤولینو په موجودیت کې واخیستل شوه.
د سترې محکمې د قضائي زده کړو عمومي رئیس محترم شیخ قیام الدین قانت صاحب د ازموینې په پیل کې ګډونوالو ته د یادې ازموینې په اړه بشپړ معلومات ورکړل.
محترم شیخ صاحب حاضرینو ته ډاډ ورکړ چې پارچې به یې د سترې محکمې د محترمو شیخ صاحبانو لخوا په دقت کتل کېږي، د بریالیو کسانو نوملړ به د سترې محکمې د بهرنیو، عامه اړیکو او مطبوعاتو ریاست په رسمي ادرسونو نشرېږي.
دغه راز د ازموینې ګډونوالو خوښي څرګنده کړه چې د ملک په یوه مهم ارګان کې د دوی د جذب په موخه ترې شفافه ازموینه واخیستل شوه وویل، موږ دغه ازموینې ته د ګډون، د ازموینې بهیر له شفافیت او نورو مراحلو بشپړ راضي او خوشحاله یو او ډاډه یو چې هغه کسانو ته چې وړ او د نورو په پرتله لوړې نمرې اخلي، به محاکمو کې د خدمت فرصت ورکول کېږي.

د مولوي محمد نصیر په نوم د بادغیس ولایت اوسېدونکي او د ازموینې یوه ګډونوال وویل، موږ د دغه ازموینې له بهیر بشپړ راضي یو، ازموینه کې د قضاء او افتاء مسلک اړوند لس پوښتنې شاملې او د حل په موخه یې موږ ته کافي وخت راکړل شو.
دغه راز د ازموینې بل ګډونوال مفتي الله داد هم د ازموینې له بهیر بشپړ رضایت څرګند کړ وویل، موږ د سترې محکمې له عالي مقام مننه کوو چې د ملک سلګونه علماء کرامو ته یې د دوی د مسلکي زده کړو او تجربې په اساس په دغه ازموینه کې د ګډون فرصت ورکړ، ازموینه ډېره شفافه او موږ ترې بشپړ راضي یو.

د یادونې وړ ده چې په دغه ازموینه کې لوړو نمرو لرونکي بریالي علماء کرام  به ۴۵ ورځني قضائي روزنیز سیمینار ته معرفي کېږي او د سیمینار تر پای ته رسولو وروسته به تر بل امتحان وروسته د محاکمو اړوند مناسبو بستونو کې په خدمت ګمارل کېږي.