د سترې محکمې د حقوقو عمومي رئیس د هېواد ختیځو ولایتونو ته سفر وکړ
د سترې محکمې د حقوقو عمومي رئیس محترم مفتي محمد ابراهیم جان (ابوالحفاظ) د یوه پلاوي په مشرۍ په ۱۴۴۶/۵ /۲۹ هـ ق نېټه د مرافعه محاکمو د رئیسانو او د حقوقو آمرینو سره د لیدنې، خالي بستونو ته د وړ کسانو د ګمارنې او د ولسوالیو مدیرانو او مسلکي غړو ته د سیمینار ورکولو په موخه ننګرهار، کونړ او لغمان ولایتونو ته سفر وکړ.
د حقوقو عمومي رئيس د دغه سفر په جریان کې د حقوقو په برخه کې نوي متحدالمآلونه، تګلارې او کړنلارې مسؤولینو ته په اصولي توګه تشرېح کړې.
په دې سربېره د حقوقو عمومي رئیس او ورسره مل پلاوي په یادو ولایتونو کې له (۲۴۰) کسانو څخه د آزادې سیالۍ له لارې ازموينه واخیسته، چې بريالي او وړ کسان به په خالي بستونو کې وګمارل شي.
د حقوقو عمومي ریاست پلاوي په خپل درې ورځني سفر کې د مسؤولينو ترمنځ د همغږۍ او همکارۍ په برخه کې مهمې لاسته راوړنې درلودې.
