په پروان ولایت کې پر یوه مجرم د «حد قذف» الهي حکم تطبیق شو
بسم الله الرحمن الرحیم
الحمد لله وكفى والصلوة والسلام على عباده الذين اصطفی، اما بعد:
قال الله تبارك وتعالى: وَالَّذِينَ يَرْمُونَ الْمُحْصَنٰتِ ثُمَّ لَمْ يَأْتُوا بِأَرْبَعَةِ شُهَدَآءَ فَاجْلِدُوهُمْ ثَمٰنِينَ جَلْدَةً وَلَا تَقْبَلُوا لَهُمْ شَهٰدَةً أَبَدًا ۚ وَأُولٰٓئِكَ هُمُ الْفٰسِقُونَ. [سورت النور: ۴آیت]
ژباړه: او څوک چې په پاک لمنو ښځو باندې تور ولګوي، بيا څلور شاهدان تېر نه کړي، هغوى اتيا دُرې ووهئ او د هغو شاهدي هېڅكله مه منئ او هغوى پخپله فاسقان دي.
نن ورځ د پروان ولایت په مرکز چاریکار ورزشي لوبغالي کې پر یوه مجرم د «حد قذف» الهي حکم تطبیق شو.
په دې قضیه کې د عیسی خان په نوم یو مجرم چې د محمد امین زوی او د توره باز لمسی دی پر عبدالرازق د ګل امین زوی او حضرت میر لمسي باندې د زنا ادعا کړې وه.
یاده موضوع د افغانستان اسلامي امارت د درې ګونو محاکمو (ابتدائیې، مرافعې او تمیز) لخوا په ډېر دقیق ډول وڅېړل شوه، چې مدعي په کې خپله ادعا ثابته نشوه کړای.
بناءً د اسلامي امارت درې ګونو محاکمو پر یاد مجرم د «اتهام زنا» د جرم لرلو له امله د «حد قذف» حکم وکړ، چې د دغه حکم په اساس مجرم ته (۸۰) شرعي دُرې سزا ورکول کېږي؛ د درې ګونو محاکمو دغه حکم د افغانستان اسلامي امارت د محترم مشرتابه عالي مقام ته د تائید لپاره راجع شو.
د افغانستان اسلامي امارت زعیم عالیقدر امیرالمؤمنین (حفظه‌الله) هم د درې ګونو محاکمو یاده فیصله له لازمو څېړنو وروسته تائید او د تطبیق حکم یې ورکړ.
د سترې محکمې محترم رئیس او قاضي القضات د سترې محکمې د جزا دېوان د رئیس محترم مفتي عتیق الله (دروېش) په مشرۍ یوه پلاوي ته دنده وسپارله چې د عالیقدر امیرالمؤمنین (حفظه‌الله) یاد حکم پروان ولایت کې د محاکمو او نورو امارتي ادارو د مسؤولینو او منسوبینو او عامو هېوادوالو په حضور کې پر مجرم تطبیق کړي.
په دې موخه جوړه شوې ناسته چې د سترې محکمې د جزا دېوان عمومي رئیس محترم مفتي عتیق الله (دروېش) او ورسره مل پلاوي، د پروان د مرافعه محکمې رئیس محترم الحاج مولوي میرآقا (خالد)، د پروان والي محترم مفتي محمد ادریس (انوري)، د یاد ولایت امنیه قوماندان الحاج قاري محمد جاوید (ضیاءالرحمن)، د علماوو شورا رئیس محترم الحاج مولوي عبدالولي (قاري‌زاده)، د نورو امارتي ادارو مسؤولینو او عامو هېوادوالو په کې ګډون درلود؛ د «حد قذف» الهي حکم تر تطبیق وروسته د دعا په ویلو پای ته ورسېده.
