د قضائیه قوې د محاکمو امنیتي او اجرائیوي چارو عمومي ریاست اړوند نظامي زده کړو مرکز د لومړۍ دورې فارغینو لمانځغونډه ترسره شوه
نن چهارشنبې (د ۱۴۴۵ هـ ق کال د شعبان المعظم میاشتې په ۲۴مه نېټه) د قضائیه قوې د محاکمو امنیتي او اجرائیوي چارو عمومي ریاست د نظامي مسلکي زده کړو د مرکز د لومړۍ دورې څخه د (۱۲۰) مجاهدینو د فراغت په پار یاد ریاست کې یوه شانداره غونډه ترسره شوه.
په دې غونډه کې چې د قضائیه قوې د محاکمو امنیتي او اجرائیوي چارو عمومي ریاست کې جوړه شوې وه؛ د سترې محکمې، کورنیو چارو وزارت، ملي دفاع وزارت او نورو امارتي ادارو مسؤولینو، شیوخ کرامو، مجاهدینو او منسوبینو ګډون درلود.
په دې غونډه کې چې د قرآنکریم د مبارکو آیاتونو په تلاوت پیل شوه د سترې محکمې او نورو امارتي ادارو محترمو مسؤولینو او شیوخ کرامو په بېلا بېلو اړوند موضوعات خبرې وکړې.
د سترې محکمې د مرکزي تمیز اړوند جزا دېوان عمومي رئیس محترم مفتي عتیق الله (دروېش) د نظامي مسلکي زده کړو مرکز د لومړۍ دورې فارغینو ته د مبارکۍ ترڅنګ د اسلام مبارک دین له نظره د نظامي مسلکي زده کړو پر ارزښت او اهمیت تفصیلي خبرې وکړې.
محترم مفتي عتیق الله دروېش وویل، د اسلام او اسلامي نظام د ساتنې لپاره نظامي مسلکي زده کړې، تمرینات او اعدادات زموږ په شریعت کې ثبوت لري.
نوموړي زیاته کړه، قرآني تعلیمات او د رسول الله صلی الله علیه وسلم ارشادات هم دا دي چې د دښمنانو پر وړاندې داسې عمل کول چې د اسلام دښمنانو ته پرې ضربه رسېږي عبادت دی؛ په دې اساس د نظامي مسلکي زده کړو حاصلولو پر مهال ستاسو ټول زحمات او ستړیاوې عبادت شمېرل کېږي.
محترم مفتي دروېش صاحب د نظامي مسلکي زده کړو د لومړۍ دورې فارغینو ته په خطاب کې زیاته کړه، خپل مسؤولیت د عبادت په نیت ترسره کوئ، د اسلامي نظام او خپل مسؤولیت قدر وکړئ، له خدای تعالی څخه وېره ولرئ او تل د ښه مسؤولیت ترسره کولو دعا کوئ، د اسلامي نظام داسې ساتنه او پالنه وکړئ لکه خپل د شخصي ملکیت.
دغه راز د فرمانونو او حکمونو د تعقیب او نظارت لوی ریاست د بشري سرچینو رئیس محترم مفتي شیرولي حقاني غونډې ته د وینا پر مهال وویل، الحمدلله د الله تعالی شکر دی چې د مجاهدینو او افغان مجاهد ملت ٢٠کلنې قربانۍ یې قبولې کړې او په نتیجه کې یې موږ دا دی له اسلامي نظام څخه برخمن شو.
نوموړي زیاته کړه، زموږ موخه د الله تعالی پر ځمکه د الله تعالی د قانون جاري کول و/دي، له ټولو مجاهدینو او د اسلامي امارت له مسؤولینو او منسوبینو مې غوښتنه ده چې په دغه نظام کې به اوس هم د جهاد په نیت خدمت کوي او تل به زړه کې له الله جل جلاله څخه خوف او وېره لري.
د کابل مرکزي زون د نظامي محکمې رئیس الحاج شیخ عبدالغفار رحماني صاحب غونډې ته په خپله عالمانه وینا کې وویل، مسلمانان باید تل د کفارو مقابلې او د اسلامي خاورې دفاع ته تیار وي، د نظام د ساتنې تر څنګ د کفارو مقابلې او د دوی د دسیسو د شنډولو لپاره تیار او بیدار وي او تل پر الله تعالی توکل ولري، په دندو کې پر مادیاتو تمرکز ونه کړي؛ بلکې خپلې دندې یوازې او یوازې د اسلامي نظام د بقاء، هیواد او ملت ته د خدمت او د الله تعالی د رضا لپاره ترسره کړي.
پر دې سربېره د ملي دفاع وزارت د تعلیماتو معینیت د عقدیتي څانګې مسؤول محترم شیخ خدایداد (مهاجر) غونډې ته د جهاد د فضیلت په اړه خبرې وکړې وویل، که جهاد نه وای نو مسلمانان به له سختو مشکلاتو سره مخ وو، دا مساجد، مدرسې، د دیني او نورو مسلکي زده کړو مراکز به نه وای، کفار له اعداد او جهاد سخته وېره لري، ستاسو د دغه عمل په وسیله به د الله تعالی دښمنان له تاسو ډارېږي.
دغه راز د قضائیه قوې د محاکمو امنیتي او اجرائیوي چارو عمومي رئیس محترم مولوي محمد عوض (سعید) غونډې ته له راغلو ټولو مېلمنو مننه وکړه چې په دې مراسمو کې یې ګډون کړی و.
غونډه د قضائیه قوې د محاکمو امنیتي او اجرائیوي چارو عمومي ریاست د نظامي مسلکي زده کړو مرکز د لومړۍ دورې د فارغینو لخوا د ځینو مسلکي حرکاتو تر نمایش وروسته د دعا په ویلو پای ته ورسېده.
د یادونې وړ ده چې په دې دوره کې ۱۲۰ تنه مجاهدینو ته د اتو اونیو په موده کې د مجربو استادانو لخوا نظامي مسلکي روزنه ورکړل شوې وه او فارغینو ته تصدیق پاڼې هم ورکړل شوې.
