د جنوب غرب زون د قضائي تفتیش عمومي ریاست یوه پلاوي د دایکندي ولایت د څلورو ولسوالیو له ابتدائیه محاکمو لیدنه وکړه
د سترې محکمې اړوند د جنوب غرب زون د قضائي تفتیش عمومي ریاست یوه پلاوي د جنوب غرب زون د تمیز عالي مقام او د سترې محکمې د قضائي معاونیت د هدایت په اساس د روان ۱۴۴۵ هـ ق کال د صفرالمظفر میاشتې په ۱۹مه، ۲۰مه، ۲۱مه، ۲۲مه او ۲۳مه نېټه د دایکنډي ولایت د شهرستان ولسوالۍ له ابتدائیه محکمې، د یاد ولایت له ښاري ابتدائیه محکمې، د مرافعه محکمې له دېوانونو، د کیتي ولسوالۍ له ابتدائیه محکمې ، د ناوه مېش ولسوالۍ له ابتدائیه محکمې او د کجران ولسوالۍ له ابتدائیه محکمې او د یادو محاکمو له زندانونو څخه لیدنه وکړه.
د جنوب غرب زون د قضائي تفتیش عمومي ریاست دغه پلاوي د خپل سفر په جریان کې په ترتیب سره لومړۍ د یادې هرې ولسوالۍ د ابتدائیه محکمې د عرایضو د ثبت کتاب، د حقوقي او جزائي دوسیو د ثبت کتاب، صادره او وارده او د رسیداتو کتابونو علاوه د حاضرۍ کتابونه هم له نږدې وکتل.
پر دې سربېره یاد باصلاحیته پلاوي د دغو ولسوالیو د ابتدائیه محاکمو لخوا صادرې شوې فیصلې په غور او دقت وڅېړلې او د فیصلو د صادرېدو په اړه یې د یادو محاکمو له مسؤولینو څخه بشپړ جزئیات وغوښتل.
د قضائي تفتیش دغه پلاوي د یادو ابتدائیه محاکمو قاضي صاحبانو ته په اصولي او اعلی طریقه د صادرې او واردې کتاب او د فیصلو د معیاري کېدو په اړه لازم هدایات او لارښوونې وکړې.
وروسته د جنوب غرب زون د قضائي تفتیش عمومي ریاست دغه پلاوي د دایکنډي ولایت د یادو ولسوالیو له زندانونو څخه لیدنه وکړه او د زندانیانو د وضعیت په اړه یې له هغوی بشپړ معلومات ترلاسه کړل.
دغه راز د قضائي تفتیش پلاوي د دایکنډي ولایت د یادو ولسوالیو له ولسوالانو، امنیه قوماندانانو، د استخباراتو له مدیرانو او نورو مسؤولینو سره وکتل او په اړوند موضوعاتو یې وسره بحث او خبرې وکړې.
