د جنوب غرب زون د قضائي تفتیش عمومي ریاست یوه پلاوي د دایکنډي ولایت د څلورو ولسوالیو له ابتدائیه محاکمو لیدنه وکړه
د سترې محکمې اړوند د جنوب غرب زون د قضائي تفتیش عمومي ریاست یوه پلاوي چې په تشکیل کې یې محترم الحاج مولوي محمد هاشم (الهام)، محترم مولوي گلبدین (حمیم) او محترم مولوي عبدالعلي (ابوسلیم) موجود وو، د جنوب غرب زون د تمیز عالي مقام او د سترې محکمې د قضائي معاونیت د هدایت په اساس د روان ۱۴۴۵ هـ ق کال د صفرالمظفر میاشتې په ۱۳مه، ۱۵مه، ۱۶مه او ۱۷مه نېټه د دایکنډي ولایت د پاتو، خدیر، سنګتخت او اشترلي ولسوالیو له ابتدائیه محاکمو او د یادو محاکمو له زندانونو څخه لیدنه وکړه.
د جنوب غرب زون د قضائي تفتیش عمومي ریاست دغه پلاوي د خپل سفر په جریان کې په ترتیب سره لومړۍ د یادې هرې ولسوالۍ د ابتدائیه محکمې د عرایضو د ثبت کتاب، د حقوقي او جزائي دوسیو د ثبت کتاب، صادره او وارده او د رسیداتو کتابونو علاوه د حاضرۍ کتابونه هم له نږدې وکتل.
پر دې سربېره یاد باصلاحیته پلاوي د دغو ولسوالیو د ابتدائیه محاکمو لخوا صادرې شوې فیصلې په غور او دقت وڅېړلې او د فیصلو د صادرېدو په اړه یې د یادو محاکمو له مسؤولینو څخه بشپړ جزئیات وغوښتل.
د قضائي تفتیش دغه پلاوي د یادو ابتدائیه محاکمو قاضي صاحبانو ته په اصولي او اعلی طریقه د صادرې او واردې کتاب او د فیصلو د معیاري کېدو په اړه لازم هدایات او لارښوونې وکړې.
وروسته د جنوب غرب زون د قضائي تفتیش عمومي ریاست دغه پلاوي د دایکنډي ولایت د یادو ولسوالیو له زندانونو څخه لیدنه وکړه او د زندانیانو د وضعیت په اړه یې له هغوی بشپړ معلومات ترلاسه کړل.
دغه راز د قضائي تفتیش پلاوي د دایکنډي ولایت د پاتو، خدیر، سنګتخت او اشترلي ولسوالیو له ولسوالانو، امنیه قوماندانانو، د استخباراتو له مدیرانو او نورو مسؤولینو سره وکتل او په اړوند موضوعاتو یې وسره بحث او خبرې وکړې.
باید وویل شي چې د قضائي تفتیش یاد پلاوي د خپل سفر په دوام د دایکنډي ولایت له مرستیال والي محترم الحاج مولوي احسان الله (اخندزاده)، امنیه قوماندان محترم الحاج مولوي عبدالحکیم (رفیع الله)، د مرافعه محکمې له رئیس محترم مولوي عبدالکریم (محمدي) او د استخباراتو له رئیس محترم مولوي عبیدالله (فیضاني) سره د ولایت په مقام کې وکتل.
د سترې محکمې د تفتیش هيئت په دې لیدنه کې دايکنډي ولايت ته د خپل سفر موخه د یاد ولایت د محاکمو د حالت څېړنه او د ادارو، امنيتي ارګانونو او محاکمو ترمنځ د لازمې همغږۍ رامنځته کول وبلل او وويل چې د اسلامي شریعت احکامو د ښه تطبيق لپاره لازمه ده چې ادارې له يو بل سره په همغږۍ کار وکړي؛ عدالت باید د اسلامي امارت د کار اساس وي، ځکه عدالت دولت پیاوړی کوي او خلک له دولت سره نږدې کوي.
بلخوا د دايکنډي ولايت مقام دغه پلاوي ته د ښه راغلاست په ویلو د رياستونو د بشپړې همغږۍ يادونه وکړه، وويل چې د محاکمو په کاري بهير کې د لا زیات شفافيت او په ټاکلي وخت قضایاوو ته د رسېدو هيله لري.
په دې غونډه کې د دايکنډي محترم مرستیال والي په کاري بهير او د قضيو په حل او فصل کولو کې د روڼتيا د رامنځته کېدو په موخه د قاضيانو بدلون او تبدیلي هم ګټوره وبلله.
