سرپل ولایت کې د مقتول کورنۍ یوه قاتل ته بښنه وکړه
نن جمعه (۲۴ /۸ /۱۴۴۴ هـ ق نېټه) د سرپل ولایت په مرکزي ستډیوم کې د سترې محکمې د یوه لوړ رتبه پلاوي په ترغیب د مقتول کورنۍ یوه قاتل ته چې درې ګونو محاکمو پرې د قصاص حکم صادر کړی و بښنه وکړه.
د جنت ګل په نوم دغه قاتل د ارسلان زوی د سرپل ولایت د سیدآباد ولسوالۍ فعلي اوسېدونکی و.
نوموړي د شرف الدین په نوم یو کس چې د خان آغا زوی او د سرپل ولایت د سیدآباد ولسوالۍ اوسېدونکی و، عمداً په قتل رسولی و.
دغه موضوع د اسلامي امارت محاکمو ته له راجع کېدو وروسته د اسلامي امارت د درې ګونو محاکمو (ابتدائیه، استیناف او تمیز) لخوا په ډېر دقیق ډول وڅېړل شوه چې د هرې محکمې لخوا پرې د قصاص حکم صادر شو.
وروسته دغه حکم د اسلامي امارت د زعیم عالیقدر امیرالمؤمین حفظه الله حضور ته د تائید لپاره وړاندې شو.
د عالیقدر امیرالمؤمنین حفظه الله لخوا هم د دې موضوع په اړه د وروستي احتیاط په منظور فوق العاده څېړنه وشوه او له علماء کرامو سره په یوه ستره مجموعه کې پرې بحث وشو چې په پای کې یې پر قاتل د قصاص شرعي حکم تائید او د هغه د تطبیق امر یې ورکړ.
په هغه غونډه کې چې په همدې مناسبت جوړه شوې وه د سترې محکمې قضائي معاون محترم شیخ محمدقاسم (راسخ)،
د سترې محکمې د نظامي منسوبینو دېوان رئیس محترم شیخ خیرجان خیرخواه، د سترې محکمې د دارالانشاء عمومي رئیس محترم مفتي عبدالرشید (سعید)، د سترې محکمې د نظامي منسوبینو دېوان مفتي محترم شیخ حیات الله (ثابت)، د سرپل د استیناف محکمې محترم رئیس، د سرپل محترم مرستیال والي او د اسلامي امارت ګڼ شمېر نورو مسؤولینو هم برخه اخیستې وه.
د سترې محکمې څخه راغلي یاد پلاوي د قصاص الهي حکم له تطبیق څخه مخکې د مقتول کورنۍ ته ترغیب ورکړ او له هغوی یې قاتل ته د بښنې هیله وکړه.
د مقتول کورنۍ او وارثینو د سترې محکمې د پلاوي او قاتل د کورنۍ د غړو یاده هیله ومنله او قاتل ته یې په خپله خوښه او رضا بښنه وکړه.
غونډه په هیواد کې د سرتاسري امنیت د لاټینګښت، د خلکو شرعي حقونو ته د لا رسېدا او د اسلامي شریعت د لا ښه تطبیق لپاره په دعاء او د مقتول د وارثینو لخوا د قاتل په بښنه پای ته ورسېده.
