پکتیا ولایت کې پنځو مجرمینو ته تعزیري سزا ورکړل شوه
نن شنبه (۷ /۶ /۱۴۴۴هـ ق) نېټه پکتیا ولایت کې د یوې ښځې په ګډون پنځو مجرمینو ته د اخلاقي فساد او غلا په جرمونو تعزیري سزا ورکړل شوه.
یادو کسانو ته د تعزیري سزا ورکولو په مناسبت جوړه شوې غونډه کې د پکتیا ولایت د محاکمو او نورو ولایتي ادارو پر مسؤولینو سربېره مجاهدینو، مشرانو او عامو هېوادوالو ګډون درلود.
غونډه د قران کریم د مبارکو ایاتونو په تلاوت پیل شوه، ورپسې علماوو او شیوخ کرامو د بېلا، بېلا موضوعاتو اړوند بیانونه وکړل، د شرعي احکامو پر تطبیق یې خوښي وښوده وویل، مجرمینو ته د تعزیري سزا تطبیق به په ټولنه کې د اخلاقي فساد، غلا او نورو جرایمو مخه ونیسي.
دغه راز له حاضرینو سره د مجرمینو د قضیو خلاصه شریکه شوه او مجرمینو ته د محکمې د فیصلې مطابق د تعزیري سزا له ورکولو وروسته غونډه د دعاء په ویلو سره پای ته ورسېده.
د یادونې وړ ده چې یادو مجرمینو چې دوسیې یې د ښاري ابتدائیه محکمې لخوا څېړل شوې وې، له زور او جبر پرته په خپلو جرایمو اعتراف او اقرار درلود او د محکمې په پرېکړه راضي وو.
