د لغمان ولایت مرافعه محکمې د نوي رئیس محترم مولوي سيد ميرآغا (هاشمي) د معرفت غونډه وشوه

د لغمان ولایت مرافعه محکمې نوی رئيس محترم مولوي سيد ميرآغا (هاشمي)، په ۲۷/ ۵/ ۱۴۴۸هـ ق نېټه د يوې غونډې په ترڅ کې، د یاد ولايت د محاکمو قضائي غړو او اداري کارکوونکو ته، معرفي او رسمًا يې دنده پيل کړه.
په دې موخه جوړه شوې غونډه کې، چې د لغمان والي محترم مولوي عبدالرحمن (کندوزي)، د مرافعه، ښاري ابتدائیه او نظامي محاکمو قضائي غړو او اداري کارکوونکو سربېره د نورو امارتي ادارو مسئولینو په کې ګډون درلود، د قرآنکریم د څو مبارکو آیاتونو په تلاوت پيل شوه.
ورپسې د دعوت او ارشاد آمر مولوي سعیدالله (حقاني) ګډونوالو ته ښه راغلاست ووایه او په محاکمو کې د شریعت د تطبیق او عدالت کولو په اړه یې تفصیلي بیان وکړ.
د غونډې په دوام د لغمان والي محترم مولوي عبدالرحمن (کندوزي) د قضاء د اهمیت په اړه بیان وکړ زیاته یې کړه، چې نن ورځ په نړۍ کې جنګ یوازې او یوازې د قضاء په اړه دی؛ ځکه ځینې خلک شرعي عدالت غواړي او ځینې بیا د دې مخالف دي.
نوموړي زیاته کړه، شرعي نظام او محاکم د شهیدانو د قربانیو پایله ده او د شهیدانو د پاکو وینو قدر وکړئ.
ورپسې د مرافعه محکمې نوي ټاکل شوي رئیس وینا وکړه او د قضاء مسلک یې یو دروند مسئولیت یاد کړ او زیاته یې کړه، چې د قضاء په برخه کې زموږ تګلاره د صحابه کرامو او تابعینو تګلاره ده.
د مرافعه محکمې نوي رئيس د ادارو ترمنځ د همغږۍ په شتون ټینګار وکړ او د یاد مسئوليت د ښې اداينې دعاء يې وکړه.
غونډه د مرافعه محکمې د جزا دېوان د رئیس محترم عارف الله (عنایت) له‌خوا د دعاء په ویلو پای ته ورسېده.
د یادونې وړ ده، چې محترم مولوي ميرآغا (هاشمي) له دې مخکې د بامیان ولایت د مرافعه محکمې د رئیس په حیث دنده ترسره کوله.