د کابل د ښاري ابتدائیه محکمې د دویم زون د نوي رئیس د معرفت غونډه ترسره شوه
نن چهارشنبې (د روان ۱۴۴۵ هـ ق کال د جمادی الثانیه میاشتې ۱۳مه نېټه) د کابل ولایت د ښاري ابتدائیه محکمې د نوي رئیس محترم مولوي عین الله (خلیل) د معرفت غونډه ترسره شوه.
په دې غونډه کې چې د قرآنکریم د مبارکو آیاتونو په تلاوت پیل شوه، د سترې محکمې د مالي او اداري چارو عمومي رئیس الحاج مولوي کریم الله (زاهد)، د بهرنیو، عامه اړیکو او مطبوعاتو رئیس مولوي عبدالرحیم (راشد)، د کابل د ښاري ابتدائیه محکمې د څلورم زون رئیس مولوي عبدالرحمن (مطمئن)، د کابل د ښاري ابتدائیه محکمې د لومړي زون رئیس مولوي عبدالبصیر (مصعب)، د یاد ریاست د دېوانونو رئیسانو او منسوبینو ګډون درلود.
غونډې ته د څلورم زون رئیس مولوي عبدالرحمن (مطمئن) په خپلو خبرو کې وویل، د افغانستان اسلامي امارت عمده موخه په هیواد کې د شر او فساد له منځه وړل او د اسلامي نظام حاکمیت و، دا چې الله تعالی موږ له دې ستر نعمت څخه برخمن کړو نو د دې نعمت د شکر اداء کولو په موخه باید د الله تعالی پر ځمکه د الله (جل جلاله) قانون تطبیق او عدالت ترسره کړو.
نوموړي د مخکني رئیس د کارونو پر ستاینې سربېره نوي رئیس ته په چارو کې د بریالیتوب دعا وکړه.
ورپسې د سترې محکمې د بهرنیو، عامه اړیکو او مطبوعاتو رئیس مولوي عبدالرحیم (راشد) د دویم زون لپاره د نوي رئیس د مقررۍ پاڼه ولوستله او نوموړی یې په رسمي ډول ټولو حاضرینو ته معرفي کړ.
د کابل د ښاري ابتدائیه محکمې نوي رئیس محترم مفتي عین الله (خلیل) په خپلو خبرو کې د عدالت تأمین خپله اسلامي او شرعي وجیبه وګڼله او ژمنه یې وکړ ه چې د خپل ور سپارل شوي مسؤولیت په برخه کې به د اسلامي شریعت مطابق د هیوادوالو خدمت کوي.
غونډه د سترې محکمې د مالي او اداري چارو د عمومي رئیس الحاج مولوي کریم الله (زاهد) لخوا د دعاء په ویلو پای ته ورسېده.
