د سترې محکمې قضائي تفتیش عمومي رئيس او مفتشینو د زابل ولايت له محاکمو او مرکزي زندان څخه لیدنه وکړه
د عالیقدر اميرالمؤمنين (حفظه الله تعالی) او د سترې محکمې د محترم مقام په هدایت د مرکزي تفتیش عمومي ریاست او د جنوب لوېدیځ زون د تفتیش ریاست ګډ پلاوي د مرکزي تفتیش عمومي رئیس محترم شیخ عبدالرحمن (فراهي) په مشرۍ، چې د جنوب لوېدیځ زون د تفتیش رئیس محترم مولوي سراج احمد (ابوسعید)، مولوي امان الله (حامد)، مولوي محمد فقیر (حنیف) او مفتي محمد اسلام (مسلم) یې غړیتوب درلود؛ د روان ۱۴۴۶هـ ق کال د ذوالقعدة الحرام میاشتې په ۲۸مه نېټه د زابل ولایت د محاکمو د تېرو فعالیتونو د څېړنو په موخه ياد ولايت ته سفر وکړ.
دغه پلاوي د سفر او ليدنې په پیل کې د زابل ولايت د مرافعه محکمې له رئیس سره وکتل؛ ورپسې يې د بندیانو ستونزو د څېړلو په موخه د یاد ولایت له مرکزي زندان او توقيف خونو څخه لیدنه وکړه، د زندان او توقيف خونو اړوند د ټولو بندیانو بشپړ شهرت، کیفیت او غوښتنې يې له ځان سره وليکل او بیا يې د اړوند محاکمو له مسؤولينو سره شریک کړل.
یاد پلاوي د خپل کاري پلان له مخې د زابل ولایت د (۱۱) ولسوالیو د ابتدائیه محاکمو، حقوقو مدیریتونو، ښاري ابتدائیه او مرافعه محاکمو اړوند دېوانونو، وثایقو آمریت، مخزن، د حقوقو آمریت او نظامي ابتدائیه محکمې څخه جلا جلا لیدنه وکړه.
دغه پلاوي د څارنې بهیر په ترڅ کې د یادو محاکمو له قضائي، اداري او مالي چارو هر اړخیزه پلټنه وکړه، د محاکمو د قضائي غړو او اداري کارکوونکو د سلوکي او مسلکي اړخونو معلومات يې واخیستل او د چارو د سمون په برخه کې یې ورته لازمې لارښوونې وکړې.
د قضائي تفتيش پلاوي د محاکمو اړوند شته ستونزې او کاري خنډونه له ځان سره وليکل او د ليدنې په وروستيو کې يې د ستونزو د حل، خنډونو د له منځه وړلو، د شته نېمګړتیاوو د اکمال په اړه د یاد ولایت د مرافعه محکمې له رئيس سره تفاهمي ناسته وکړه او ځينې ستونزې يې په جلا جلا توګه ورسره شريکې کړې.
دغه پلاوي د څارنې او ليدنې په دوام د یاد ولایت ولسواليو د ځينو مسؤولینو سره ناستې وکړې او د محاکمو د فعالیتونو د لا ښه پرمختګ او د ځينو اړوند ستونزو د حل په موخه يې د هغوی نظرونه واورېدل.
د قضائي تفتیش د څارنې او پلټنې پلاوي ياد له لاسته راوړنو ډک سفر د ۱۴۴۶هـ ق کال د ذوالحجة الحرام میاشتې په (۲۵) مه نېټه پای ته ورسېد.
