د سترې محکمې د ظرفيت لوړونې او اجراآتو ارزونې رياست لخوا د کابل ولایت مرافعه محکمې د وثايقو او اسنادو د ثبت شپږو آمريتونو کارکوونکو ته (دوه)، څلور ورځني سيمينارونه وړاندې شول

د سترې محکمې د ظرفیت لوړونې او اجراآتو د ارزونې ریاست لخوا د سترې محکمې عالي مقام په هدایت د کابل ولايت مرافعه محکمې اړوند وثايقو او اسنادو د ثبت شپږو حوزو د آمريتونو کارکوونکو ته د اداري اجراآتو زده کړې په موخه (دوه)، څلور ورځني سیمینارونه وړاندې شول.
په یادو سیمینارونو کې چې د روان ۱۴۴۶ هـ ق کال د شعبان المعظم میاشتې په ۲مه نېټه پیل او د همدې میاشتې تر ۱۲مې نېټې یې دوام درلود، د مسلکي استادانو لخوا ګډونوالو ته د وثايقو د ترتیب او طی مراحلو، د پلان جوړونې اساساتو، اداري مراسلاتو، کاري ارتباطاتو او راپور ليکنې اړوند ګټور او لازم موارد تدریس شول.
دغه راز د سیمينارونو په پای کې ټول ګډونوال د لومړنۍ او وروستۍ ازموينې په توګه و ارزول شول، ترڅو د پلي شوو سیمينارونو د اغېز کچه په ډاګه شي، چې په پايله کې يې اغېز مثبت او د ګډونوالو په زده کړه کې په لوړه کچه بدلون راغلی و.
د يادو سيمينارونو په اختتاميه غونډه کې د سترې محکمې د استخدام او سوانحو رئيس محترم مفتي عبدالوارث (سعيد) د علم د حاصلولو او کاري ظرفيت لوړونې په تړاو او د ظرفيت لوړونې او اجراآتو د ارزونې رئيس محترم حافظ نصير احمد (صياد) د وثایقو د ترتيب او طی مراحلو، په اداري چارو کې د دقت، سرعت او مؤثريت اړوند ګډونوالو ته هر اړخيزې خبرې وکړې او د ګډونوالو نظريات او وړانديزونه يې واورېدل.
د یادونې وړ چې په یادو سيمينارونو کې شاوخوا (۶۰) اداري کارکوونکو برخه اخيستې وه.
د سیمینارونو اختتامیه غونډه د دعاء په ويلو پای ته ورسېده.