د محاکمو د مراجعینو لپاره عامه پوهاوی

بسم الله الرحمن الرحیم
قَالَ رَسُولُ اللهِ صَلَّى اللَّهُ عَلَيْهِ وَسَلَّمَ: ‌لَعَنَ ‌اللهُ ‌الرَّاشِيَ، ‌وَالْمُرْتَشِيَ، ‌وَالرَّائِشَ، وَهُوَ الَّذِي يَمْشِي بَيْنَهُمَا. [مسند احمد]
ژباړه: رسول الله (صلی الله عليه وسلم) فرمايي: الله تعالی په رشوت اخيستونکي، رشوت ورکوونکي او هغه چا لعنت ويلی چې د دوی ترمینځ منځګړيتوب کوي.
قدرمنو مراجعینو! تاسو ته بهتره معلومه ده چې د افغانستان اسلامي امارت محاکم د هېوادوالو اقتصادي وضعیت او خپل شرعي مکلفیت ته په کتو خپل ټول خدمات که هغه د دوسیو حل او فصل برخه کې دي یا د وثایقو د اجرا برخه کې په وړیا ډول ترسره کوي او په دې برخه کې له هېڅ مراجعه کوونکي څخه د محکمې لخوا پيسې نه اخيستل کيږي، له دې سره سره بيا هم ځينې فرېبکاران او مفسدين د عامو هېوادوالو له ناخبرۍ څخه په ګټه اخيستنې سره د محکمې په نوم پيسې اخلي چې ځيني يې د سترې محکمې لخوا نیول شوي؛ بناءً ټولو مراجعینو ته دغه خبر یو ځل بیا رسوو چې هېڅ کمېشنکار یا بل کس ته دې د خپلو دوسیو د حل او فصل، نوبت یا وثایقو د اجرا په موخه پیسې نه ورکوي؛ د مشکل په صورت کې د محاکمو مراجعین (مدعي، مدعي علیه او شرعي وکیل) کولای شي خپله ستونزه د عریضې په ډول د سترې محکمې د عالي مقام دوولسم (۱۲) نمبر غرفې سره شریکه کړي، له عریضې سره دې خپل اسناد او شواهد هم ضمیمه کړي، ستره محکمه به یې موضوع دقیقه وڅېړي او په اړه به یې د شرعي اصولو مطابق اجراآت وکړي.
البته که کوم کس چاته د محکمې په نوم پیسې ورکړي؛ نو د اسلامي امارت محاکم به [پیسه ورکوونکی، پیسه اخیستونکی او د دوی ترمنځ منځګړی] د شرعي اصولو په رڼا کې مجازات کړي.
د هېواد د سترې محکمې او اړوند محاکمو د لاسته راوړنو او فعالیتونو په اړه د ډېرو معلوماتو او اطلاعاتو ترلاسه کولو په موخه د سترې محکمې د بهرنیو، عامه اړیکو او مطبوعاتو ریاست د ټولنیزو رسنیو او چاپي خپرونو لاندې ادرسونه تعقیب کړئ.