د قضائیه قوې د محاکمو امنيتي او اجرائیوي چارو عمومي ریاست د تشکیلاتي جوړښت د تنظیم او ارزونې غونډه وشوه
په ۱۱/۱۱/ ۱۴۴۵ هـ ق نېټه د قضائیه قوې د محاکمو امنيتي او اجرائیوي چارو عمومي ریاست د ناستو په تالار کې د یاد ریاست د محترم رئیس الحاج مولوي محمد عوض (سعید) په مشرۍ د نظامي محاکمو د امنيتي او اجرائیوي قطعاتو د عمومي قوماندانیو، مدیریتونو، آمریتونو او اړوند منسوبینو د ۱۴۰۳هـ ش کال د تشکیلاتي جوړښت، اړتیاوو او لاسته راوړنو د ارزونې په موخه غونډه وشوه.
په دې غونډه کې د قضائیه قوې د محاکمو امنيتي او اجرائیوي چارو عمومي رئيس الحاج مولوي محمد عوض (سعید)، د نظامي محاکمو د امنيتي او اجرائیوي قطعاتو د عمومي قوماندانۍ سرپرست حافظ سید حکمت الله آغا ذهین، د دفتر عمومي مدیر مولوي خان محمد مستغفر، د تأمیناتو عمومي مدیر قاري فرید احمد همت، د پېژند عمومي مدیر مولوي نور محمد قتیبه، د محاسبې عمومي مدیر مولوي محمد اسماعیل ناظم او نورو مسؤولینو او منسوبینو ګډون درلود.
غونډه د قرآنکریم د څو مبارکو آیاتونو په تلاوت پیل شوه؛ ورپسې محترم الحاج مولوي محمد عوض سعید د مسؤولیتونو په سپارلو کې په عدل ټینګار وکړ وویل، موږ ته الله تعالی په عدل امر کړی او مسؤولیتونه اهل کسانو ته سپارل عدل دی.
نوموړي زیاته کړه، مسؤولیت امتیاز مه ګڼئ؟؛ بلکې مسؤولیت یو دروند الهي امتحان دی.
د غونډې په دوام د ياد عمومي رياست اړتیا ته په کتو په تشکیلاتي جوړښت کې پر اړینو تغیراتو تر مشورو او بحث وروسته موافقه وشوه.
دا غونډه د دعاء په ویلو پای ته ورسېده.
