د سترې محکمې د جزا دېوان عمومي رئيس د لغمان او ننګرهار ولایتونو د قضائي، نظامي او ملکي ادارو له مسؤولينو سره وکتل
د سترې محکمې د جزا دېوان عمومي رئيس محترم مفتي عتیق الله (دروېش) د روان هجري قمري کال د رجب المرجب میاشتې په ۱۶مه او ۱۷مه نېټه لغمان او ننګرهار ولایتونو ته د سفر پر مهال د يادو ولايتونو د ټولو قضائي، نظامي او ملکي ادارو له مسؤولينو سره وکتل.
د دې سفر او ليدنو موخه د ولایتي ادارو ترمنځ د همغږۍ لا تقویه وه، په يادو ليدنو کې د سترې محکمې د جزا دېوان عمومي رئيس وویل، یوازینی نظام چې د انسانانو او ان ټولو ژوندیو موجوداتو حقوق په کې خوندي دي، اسلامي نظام دی، د دې نظام د پایښت او ساتنې لپاره کار کول زموږ ټولو مسؤولیت دی.
په ياده ليدنه کې محترم مفتي (دروېش) د قضائي، ملکي او نظامي ادارو ترمنځ پر لا ښه همغږۍ، د فساد پر وړاندې پر مبارزې، د جرایمو په مخنیوي او دغه راز د حکومت او ولس ترمنځ په باور رامنځته کولو ټینګار وکړ او له مسؤولینو یې وغوښتل چې د خپلو دندو د لایحو مطابق مسؤولیتونه ترسره کړي.
د ليدنو په وروستيو کې د لغمان او ننګرهار ولایتونو مسؤولینو راغلي پلاوي ته په پورته یادو شویو برخو کې د همکارۍ ډاډ ورکړ او زياته یې کړه، دلته د محاکمو، ملکي او نظامي ادارو ترمنځ بشپړه همغږي موجوده ده، د شرعي نظام او د اسلامي امارت د مشرتابه ټول فرمانونه په ښه ډول پلي کېږي.
