د قضائیه قوې د محاکمو امنیتي او اجرائیوي چارو عمومي ریاست یوه څلور کسیز پلاوي د شمال ختيځ زون د محاکمو د امنیتي قطعاتو له چارو څارنه وکړه

د روان ۱۴۴۵ هـ ق کال د جمادی الثانيه میاشتې له ۱۰مې نېټې څخه تر ۲۰مې نېټې پورې د قضائیه قوې د محاکمو د امنیتي او اجرائیوي چارو عمومي ریاست اړوند د تفتیش او کنټرول مدیریت څلور کسیز پلاوي د تفتیش او کنټرول د عمومي مدیر مفتي عبدالرؤف (عمري) په مشرۍ د ملکي او نظامي محاکمو د امنیتي قطعاتو له چارو لیدنه او څارنه وکړه.
یاد پلاوي په دې لیدنه کې د کندوز ، سمنګان ، بغلان ،تخار او بدخشان د ملکي او نظامي محاکمو د امنیتي قطعاتو د مجاهدینو د تعیناتو، اداري او امنیتي چارو، د توقیف خونې امنیت تأمینولو، اکمال او توزیع، د پرسونل له حاضرۍ، د ۲۴ساعته نوکریوالۍ د تطبیق، د پیره‌دارۍ له ځایونو او نورو اړوند مواردو څخه کنټرول او څارنه وکړه.
دغه راز یاد پلاوي مجاهدینو ته د صورت او سیرت د اصلاح، پر نبوي سنتو د ځان برابرولو، په جماعت سره د لمانځه اداکولو او خپلو دندو ته د پاملرنې برخه کې د لازمو لارښوونو او سپارښتنو تر څنګ مجاهدین د امنیتي چارو د لاښه سمبال، له مراجعینو سره نېک چلند او نبوي اخلاقو لرلو ته وهڅول چې په یادو موضوعاتو کې اړوند مسؤولینو ته لارښوونې او سپارښتنې وشوې.
د یادونې وړ ده چې د یاد پلاوي او د محاکمو د رئیسانو ترمنځ د همغږۍ، اتفاق او همکاريو د لا ټینګښت لپاره اړینې ناستې ترسره شوې.