د جنوب غرب زون د تميز عالي مقام د نظامي منسوبينو دېوان ته نوی رئيس ور معرفي شو
نن پنجشنبه د ۲۳/ ۵/ ۱۴۴۵هـ ق نېټه د جنوب غرب زون د تميز عالي مقام په عمومي رياست کې د دېوانونو لوړ رتبه مسؤلينو، د دېوانونو غړيو، د مقام رياست عمومي رئيس، د سترې محکمې قضائي معاون، دفتر رئيس، د تفتيش رئيس، د تعليمات قضائي رئيس او ګڼ شمېر نورو مسؤلينو په شتون کې د نوي رئيس محترم الحاج شيخ الحديث مولوي عزيزالله (مظهري) د معرفت غونډه ترسره شوه.
ياده غونډه د قرانکريم د څو مبارکو آياتونو په تلاوت سره پيل شوه؛ ورپسې د سترې محکمې قضائي معاون شيخ الحديث والتفسير سردار محمد (ابوالفيضان) صاحب د اصولو د پابندۍ، اطاعت، د ښه خدمت په اړه تفصيلي خبرې او بيان وکړ، نوموړي د اسلامي امارت په مسؤلينو غږ وکړ چې د مشرتابه ټولو فرامينو، احکامو او هداياتو مطابق چلند وکړئ، د زورېدلي ملت تر خپل وسه خدمت او همکاري وکړئ.
د يادې غونډې په دوام د جنوب غرب زون د تميز عالي مقام او د سترې محکمې قضائي معاون له لوري د نظامي منسوبينو دېوان رياست منسوبينو او کارکوونکو ته نوی رئيس محترم الحاج شيخ الحديث مولوي عزيزالله (مظهري) معرفي او ور وپېژندل شو.
ياده غونډه د دعاء په ويلو سره پای ته ورسېده.
