د دایکنډي ولايت د مرافعه محکمې عمومي رئیس د ياد ولايت له محبس څخه ليدنه وکړه
د ١٤٤٥ هـ ق کال د ربيع الثاني مياشتې په ۸مه نېټه د دایکنډي ولایت د مرافعه محکمې عمومي رئیس محترم الحاج شیخ عبدالکریم (محمدي) د تحریراتو د آمر نصرالله (ابراهیمي) په ملتیا د ياد ولایت له مرکزي عمومي محبس څخه ليدنه وکړه.
د يادې ليدنې په ترڅ کې له ټولو نارینه وو او ښځو بنديانو څخه د دوی د وضعیت په اړه پوښتنې وشوې چې د مسٶولينو له چلند او رفتار څخه تر ډېره حده خوښ او راضي وو، د کومو بنديانو چې د قيد موده ډېره وه د ځانګړي ترحم او شفقت له مخې يې دوسيې د جنوب غرب زون د تميز عالي مقام ته ولېږل شوې.
د يادې ليدنې په پاى کې د ټولو بنديانو ستونزې واورېدل شوې، د زندان مسٶولينو ته لازمې لارښوونې او سپارښتنې وشوې او د زندان د آمر هڅې د بنديانو د اصلاح او رفتار په برخه کې وستايل شوې.
