د سترې محکمې د قضائي تفتیش عمومي ریاست په (۲۴) ولایتونو کې د اختصاصي محاکمو او د حقوقو د آمریتونو د پروسې د انتقال لپاره هیئتونه ولېږل
د ۱۴۴۴ هجري قمري کال د شوال میاشتې په ۲۵مه نېټه د سترې محکمې د محترم مقام په هدایت د قضائي تفتیش د عمومي رئیس محترم مفتي محمد ابراهیم جان "ابوالحفاظ" په مشري، د یاد ریاست د قضائي پلټونکو څخه څلورو ګروپیز هيئتونه د هیواد (۲۴) ولایتونو ته د حقوقو د آمریتونو او د مرافعه محاکمو انګړ ته د اختصاصي محاکمو انتقال، د محاکمو د نقلیه وسائلو او ملکیتونو د تثبیت په موخه سفر وکړ،
چې په ترکیب کې محترم حافظ مولوي عبدالولي "محمود"، مولوي سیف الرحمن" ذاکر"، مولوي روزي محمد "زمیل"، مولوي عبدالبصیر"غزنوي"، مـولوي عبـــدالوارث " سعید"، مولوي عبدالرحمن"مخدوم" او مولوي عبدالولي"مصباح" شموليت درلود.
مؤظف پلاوي د استیناف رئیسانو هغه وړانديزونه چې د حقوقو د آمریتونو او اختصاصي محاکمو، نقلیه وسائلو، د ملکیتونو د تثبیت د سمون او پرمختک په غرض درلودل په دقیقه او هر اړخيزه ډول وڅېړل او په اړه يې مفیدي مشورې او ګټورې لارښوونې وکړې.
هيئت د یادو ادارو د ستونزو د هواري او د نیمګړتیاوو د اکمال په اړه د محاکمو له رئیسانو سره تفاهمي ناستي ترسره کړې او د چارو د لا ښه سمون په برخه کې ورته لازمې لارښوونې وکړې.
همدا راز پلاوي د محاکمو مسؤلینو ته هدایت ورکړ، چې د هیوادوالو مسائلو ته په ټاکلې وخت او په شفافه توګه په رسېدو سره د قضیو د ځنډ له امله د خلکو شکایت رفع کړي.
دغه ډول هيئت د محاکمو لخوا شوي پیشنهادونه د سترې محکمې محترم مقام ته وړاندې کړل.
د قضائي تفتیش هيئت د ۱۴۴۴ هجري قمري کال د ذو القعدې میاشتې په ۴مه نېټه خپل سفرونه په داسې حال کې پای ته ورسول چې له لاسته راوړونو ډک وو.
