نن چهارشنبه پروان ولایت کې دوو مجرمینو ته تعزیري سزا ورکړل شوه
نن چهارشنبه (د روان ۱۴۴۴ هـ ق کال د شوال المکرم میاشتې په ۲۰مه نېټه) د پروان د مرافعه محکمې لخوا دوو مجرمینو ته له «کوره د تېښتې» د جرم په اساس تعزیري سزا ورکړل شوه.
یادو مجرمینو ته د تعزیري سزا د تطبیق په موخه ناسته کې چې د جبل السراج ولسوالۍ په انګړ کې جوړه شوې وه د مرافعه محکمې رئیس، د ولایتي محاکمو قضائي او اداري کارکوونکو، د ولایتي ادارو مسؤولینو او ګڼ شمېر عامو هیوادوالو ګډون درلود.
یادې ناستې ته د مرافعه محکمې رئیس محترم مولوی روح الله "عبدالسلام" ، د پروان محترم والي او یو شمېر نورو مسؤولینو خپلې عالمانه ویناوې وکړې، ورپسې د مجرمینو د قضیو خلاصه بیان شوه او یادو مجرمینو ته د محکمې د پرېکړې مطابق تعزیري سزا ورکړل شوه.
دغه ناسته د دعاء په ویلو سره پای ته ورسېده.
