د لوګر ولایت د استیناف محکمې په انګړ کې میاشتنۍ ناسته ترسره شوه
د پنجشنبې په ورځ (۱۷ /۷ /۱۴۴۴ هـ ق) نېټه د لوګر ولایت د استیناف محکمې رئیس مولوي روح الله (عبدالسلام) په خپل ریاست کې د استیناف، ښاري او ولسوالیو محاکمو له رئیسانو سره میاشتنۍ ناسته ترسره کړه.
یاده غونډه د قرآنکریم د مبارکو ایاتونو په تلاوت پیل شوه.
ورپسې د لوګر د استیناف محکمې رئیس د غونډې حاضرینو ته د قضائي او اداري چارو په اړه لازمې هر اړخيزې لارښوونې وکړې.
نوموړي وویل، له مراجعینو سره نېک او مناسب چلند زموږ ټولو مسؤولیت او مکلفیت دی، هر هیوادوال چې محکمې ته مراجعه کوي هغه حقونه یې باید محفوظ وي چې اسلامي شریعت او قانون ورکړي دي او هیڅ یو یې باید له خپلو حقونو بې برخې نشي.
د استیناف محکمې رئیس محترم مولوي روحالله (عبدالسلام) له مسؤولینو غوښتنه وکړه چې د قضاء د حیثیت او خپل درانه مسؤولیت دې پوره اهتمام وکړي، خپلو دندو ته دې پابند اوسي، او د قضایاوو د ژر او غوره حل لپاره دې له خپل ټول توان او قوت څخه استفاده وکړي.
د مجلس په پای کې د لوګر د محاکمو رئیسانو خپلې ستونزې او غوښتنې د استیناف محکمې له رئیس سره شریکې کړې، د نوموړي له لوري دوی ته ژمنه ورکړل شوه چې د دوی ټولو ستونزو او غوښتنو ته به د امکان تر حده رسېدنه کوي او د کارونو د روڼتیا او چټکتیا لپاره به ټول لازم امکانات ورته برابروي.
یاده غونډه د دعاء په ویلو سره پای ته ورسېده.
