کندهار ولایت کې ۹ مجرمینو ته تعزیري سزا ورکړل شوه
د سه شنبې په ورځ (24 /6 /1444هـ ق) نېټه په کندهار ولایت کې د استیناف محکمې د جزاء دېوان لخوا په احمد شاهي لوبغالي کې 9 مجرمینو ته د لواطت او غلا د جرم په وجه تعزیري سزا ورکړل شوه.
یادو مجرمینو ته د تعزیري سزا د ورکولو په مناسبت په جوړه شوې غونډه کې د استیناف محکمې رئیس مولوي محب الله، د استیناف محکمې د جزاء دېوان رئیس مفتي فضل الله (عاصم)، د استیناف او ښاري محاکمو د دېوانونو قضاتو، د کندهار مرستیال والي الحاج مولوي حیات الله (مبارک)، د کندهار امنیه قوماندان مولوي رحیم الله (محمود)، د امر بالمعروف مسؤولینو او عامو خلکو ګډون کړی و.
غونډه د قرآنکریم د څو مبارکو آیاتونو په تلاوت پیل شوه، ورپسې د کندهار ولایت د استیناف محکمې د جزاء دېوان رئیس، د کندهار مرستیال والي، امنیه قوماندان او د امربالمعروف مسؤول یو په بل پسې د جلسې ګډونوالو ته خپلې ارزښتناکې ویناوې واورولې.
یاده غونډه مجرمینو ته د تعزیري سزا تر تطبیق وروسته د دعاء په ویلو پای ته ورسېده.
