د قضائي پلټنې عمومي ریاست د تفتیش مسلکي غړو د پکتیکا ولایت له محاکمو او مرکزي زندانه لیدنه وکړه

د سترې محکمې د محترم مقام په هدایت د قضائي پلټنې عمومي ریاست د خپل تفتیشي پلان له مخې د یاد ریاست د قضائي پلټونکو څخه جوړ درې کسیز پلاوي چې په ترکیب کې یې مولوي عبیدالله (جمالي)، مولوي عبدالوارث (سعید) او مولوي عبدالبصیر (غزنوي) شتون درلود.

یاد پلاوي د 1444 هجري قمري کال د ربیع الثاني میاشتې په 26مه نېټه پکتیکا ولایت ته د محاکمو د تېرو فعالیتونو د څېړنې او بررسۍ په موخه سفر وکړ.

د قضائي تفتیش دغه پلاوي لومړۍ د پکتیکا د مرافعه محکمې له رئیس سره وکتل، ورپسې یې د خپل کاري پلان له مخې د یاد ولایت د (21) ولسوالیو د ابتدائیه شرعي محاکمو، د پکتیکا له ښاري محاکمو له ریاست او اړونده دېوانونو او د مرافعه محکمې له اړوند دېوانونو څخه جلا،جلا لیدنه وکړه.

دغه پلاوي د قضائي تفتیش بهیر پر مهال د یادو محاکمو د قضائي، اداري او مالي چارو هر اړخېزه پلټنه ترسره کړه، د محاکمو د قضائي غړو او اداري کارکوونکو د سلوکي او مسلکي  اړخونو په تړاو یې بشپړ معلومات ترلاسه کړل، د چارو د لا بهبود لپاره یې ورته لازمې لارښوونې وکړې.

قضائي تفتیش دغه پلاوي د محاکمو اړوند شته ستونزې، د کار پر وړاندې شته خنډونه او لوژستیکي نیمګړتیاوې له ځان سره نوټ کړې. په لومړي قدم کې یې د ښاري محکمې په دېوانونو کې شته ستونزې د ښاري محکمې له رئیس سره شریکې کړې، ورپسې یې د ستونزو د هواري او نیمګړتیا وو د اکمال په اړه د پکتیکا ولایت د مرافعه محکمې د ریاست له مقام سره تفاهمي ناسته ترسره کړه او ټولې ستونزې یې په جلا، جلا توګه ورسره شریکې کړې.

دغه راز یاد پلاوي د بندیانو د وضعیت د څېړلو په موخه د پکتیکا ولایت له مرکزي زندان څخه لیدنه وکړه او د یاد زندان اړوند نارینه او ښځینه بندیانو بشپړ شهرت او وضعیت یې له ځان سره نوټ او بیا یې له اړونده محاکمو سره شریک کړل.

د پلټنې دغه پلاوي د خپل سفر په پای کې د پکتیکا ولایت له محترم والي سره وکتل او د محاکمو د فعالیتونو د لاښه پرمختګ او د ځینو مربوطه ستونزو د حل په اړه یې د هغوی نظرونه واورېدل.

د قضائي تفتیش د پلټنې پلاوی د 1444 هجري قمري کال د جمادی الاول میاشتې په 12مه نېټه بېرته کابل ته راغی او د خپل سفر ټول راپور او معلومات یې د سترې محکمې له محترم مقام سره شریک کړل.