د سترې محکمې د مسؤولینو ترمنځ اداري ناسته ترسره شوه
د سترې محکمې د مسؤولینو ترمنځ اداري ناسته ترسره شوه
د سترې محکمې د اداري معاون محترم شیخ عبدالمالک (حقاني) حفظه الله په مشرۍ په ۱۴۴۴/۲/۲۲هـ ق نېټه د سترې محکمې د اداري چارو د لا ډېر بهبود او په چارو کې د شفافیت رامنځته کولو په موخه اداري ناسته ترسره شوه.
په دې ناسته کې چې د سترې محکمې د اداري معاونیت په دفتر کې ترسره شوه د سترې محکمې د مقام د دفتر رئیس، د استخدام رئیس، د مالي چارو رئیس، د بهرنیو، عامه اړیکو او مطبوعاتو سرپرست رئیس، د بشري سرچینو سرپرست رئیس، د سترې محکمې د محافظتي قطعې عمومي قوماندان او نورو اړوند مسوولینو ګډون درلود.
یاده اداري ناسته د سترې محکمې د اداري معاون محترم شیخ عبدالمالک (حقاني) حفظه الله په تفصیلي خبرو پیل شوه، ورپسې د غونډې د ترتیب شوې اجنډا مطابق په لاندې موضوعاتو خبرې وشوې:
- په عمومي ډول د سترې محکمې د امنیت ټینګښت.
- د سترې محکمې د مرکزي ریاستونو او ولایتي مرافعه محاکمو له لوري په ټاکلي وخت د قضائي او اداري راپورونو را لېږل.
- په حقوقي او جزائي برخو کې د محاکمو د دیوانونو لخوا د قضیاوو د ثبت سیستم د فورمو نه لېږل.
- د محاکمو اړوند د مسوولینو ته د نقلیه وسایلو د کارټونو جوړول او توزیع.
- د ټولو مرکزي ریاستونو لخوا باید د نشر مطالب په ټاکلي وخت له بهرنیو، عامه اړیکو او مطبوعاتو ریاست سره شریک شي.
- د فواید عامه بلاکونو تر شا پارکېنګ چې اوس مهال له سترې محکمې سره دی.
- د ولایتي مرافعه محاکمو له ریاستونو سره د مستوفیتونو همکاري او ځینې نور مهم موارد.
د یادو مواردو په تړاو د ناستې د ټولو ګډونوالو تر خبرو او وړاندیزونو وروسته د سترې محکمې اداري معاون محترم شیخ عبدالمالک (حقاني) هر اړخیزې خبرې او د موضوعاتو اړوند هدایات شریک کړل.
ناسته د دعاء په ویلو سره پای ته ورسېده.
