د بلخ ولایت مرافعه محکمې رئیس د یاد ولایت د چهاربولک او چمتال ولسوالیو له ابتدائیه محاکمو څخه لیدنه وکړه
د بلخ ولایت مرافعه محکمې رئیس محترم الحاج شیخ غلامالله (عادل) په مشرۍ يوه پلاوي؛ چې د مرافعه محکمې د عامه امنیت دېوان رئیس مولوي عبدالسلام (مظهري) يې ملتیا کوله، په ۱۸/ ۵/ ۱۴۴۷هـ ق نېټه د یادو ولسوالیو له ابتدائیه محاکمو څخه لیدنه وکړه.
دغه پلاوي د ليدنې په پيل کې له قضائي او اداري کارکوونکو سره غونډه وکړه؛ پر یو شمېر اړینو موضوعاتو یې خبرې وکړې او په ځینو برخو کې یې ورته لازمې لارښوونې او هدایات وکړل.
د ليدنې په دوام یاد پلاوي د دوی شته ستونزې واورېدې او له ځان سره يې یادداشت کړې.
دغه راز د مرافعه محکمې پلاوي د ابتدائیه محاکمو ټولې قضائي او اداري چارې وارزولې، چې الحمدلله چارې يې د شریعت او اصولو په رڼا کې ترسره کېدې او د لا ښهوالي په موخه لازمې مشورې ورکړل شوې.
د مرافعه محکمې رئيس پر یو شمېر موضوعاتو خبرې وکړې او ټينګار وشو چې د محکمې او نورو ارګانونو ترمنځ دې د همغږۍ مجلسونه وخت پر وخت جوړېږي، ستاسو پر وخت همکاري د مسؤولیت ښه سرته رسولو او د قضائي خدمتونو د دوام تضمین دی.
