د روزګان د مرافعه محکمې رئیس د خاص روزګان له ابتدائیه محکمې لیدنه وکړه
د روزګان ولایت د استیناف محکمې رئیس شیخ مولوي سخیداد (ابوالتقي) او د یاد ریاست اجرائیه مدیر محب الله (نظري) د روان ۱۴۴۴ هـ ق کال د جمادي الثاني میاشتې په ۱۱مه نېټه د دغه ولایت د خاص روزګان ولسوالۍ د ابتدائیه محکمې او نورو اداري مسؤولینو او عامو خلکو سربېره د دې ولسوالۍ له زندان څخه لیدنه وکړه.
د روزګان ولایت د مرافعه محکمې رئیس په دې لیدنه کې د خاص روزګان ولسوالۍ د ابتدائیه محکمې قاضي، مفتي او محرر ته د قضائي چارو د ښه تر سره کولو برخه کې لازم هدایات وکړل وویل، د خلکو عرایضو ته دې په ټاکلي وخت رسېدنه وشي، د خلق الله کارونه دې په شفاف ډول په خپل وخت حل او فصل شي.
محترم شیخ سخیداد (ابوالتقي)یادونه وکړه چې د خپلو ترسره کړو فعالیتونو ربعوارو راپورونو، د سترې محکمې د دارالانشاء عمومي ریاست متحدالمآلونو، د مرافعه محکمې مکتوبونو او احکامو ته دقیقه توجه وکړئ، په ټاکلي و خت مرافعه ریاست ته د خپلو اجراآتو خبر ورکوئ او راپورونه مو په ښه ډول راواستوئ؛ تر څو اطاعت پر ځای او د مراجعینو ستونزې په خپل وخت سره حل شي.
د یاد ریاست اجرائیه مدیر محب الله (نظري) د ولسوالۍ د ابتدائیه محکمې د اداري بخش کارکوونکو ته د صادرې او واردې، رسیداتو او اندراج اړوند لازمې لارښوونې وکړې.
د روزګان ولایت د استیناف محکمې رئیس په یاده لیدنه کې ګډونوالو ته وویل چې د ولسوالۍ له نورو چارواکو سره نېک برخورد وکړي تر څو اسلامي امارت قوي او متحد پاته شي.
د خاص روزګان د ابتدئیه محکمې قاضي، مفتي او محرر د استیناف محکمې له رئیس سره ژمنه وکړه چې ان شاءالله ستاسو ټولې خبرې او سپارښتنې به عملي کوو او خپل قضائي امور به په صداقت ترسره کوو.
وروسته محترم شیخ سخیداد (ابوالتقي) د ولسوالۍ له محبس څخه لیدنه وکړه او د ټولو بندیانو مشکلات یې واورېدل او بندیانو ته يې ډاډ ورکړ چې ان شاءالله دوسیې به یې ژر څېړل کېږي.
نوموړي د محبس مسؤولینوته وویل، بندیانو سره باید ښه چلند وکړئ.
ورپسې د مرافعه محکمې رئیس شیخ مولوي سخیداد (ابوالتقي) د خاص روزګان له ولسوال او امنیه قومندان سره لیدنه کې په بېلا بېلو اړوند موضوعاتو خبرې وکړې، ولسوال او امنیه قومندان د استیناف محکمې له رئیس سره ژمنه وکړه چې ان شاءالله په ټولو اړوند برخو کې به له محاکمو سره بشپړه همکاري کوي.
دغه راز محترم شیخ ابوالتقي د یادې ولسوالۍ له اوسېدونکو، علماوو او قومي مشرانو سره ولیدل، د هغوی مشکلات يې واورېدل او ډاډ یې ورکړ چې ستاسو ټول مشکلات به ان شاءالله د شریعت په رڼا کې حل او فصل کوي.
د سفر په پای کې شیخ سخیداد (ابوالتقي) د خاص روزګان ولسوالۍ اړوند شیش فر کلي کې چې د دوو قومونو ترمنځ د ځمکې پر دعوه وه، له هغې ځمکې هیئتي وکړه او د هغوی موضوع یې له نږدې څخه ولیده.
