د سترې محکمې اداري معاون د یوه پلاوي په مشرۍ د هیواد پنځو ولایتونو ته سفر وکړ
د سترې محکمې اداري معاون محترم شیخ عبدالمالک حقاني حفظه الله د سترې محکمې د نظامي محاکمو د معاون او د نظامي منسوبینو دیوان د رئیس محترم شیخ خیرجان (خیرخواه) صاحب په ملتیا د قضائیه قوې اړوند چارو د چټکتیا او اغېزمنتوب رامنځته کولو په موخه د هیواد پنځو ولایتونو(لوګر، پکتیا، خوست، پکتیکا او غزني) ته سفر وکړ.
د سترې محکمې اداري معاون او ورسره مل پلاوي یادو ولایتونو ته د دغه سفر پر مهال چې په ۵/۲/۱۴۴۴ هـ ق نېټه پیل او تر۱۱/۲/۱۴۴۴ هـ ق نېټې یې دوام درلود، د ولایتونو د استیناف او ښاري محاکمو له رئیسانو، قضائي کارکوونکو او نورو ولایتي ادارو له مسوولینو سره وکتل.
محترم شیخ عبدالمالک حقاني صاحب له یادو مسوولینو سره د لیدنې پر مهال د اړوند مهمو قضائي موضوعاتو په اړه تفصیلي خبرې وکړې.
دغه راز د سترې محکمې اداري معاون او ورسره مل پلاوي د اسلامي امارت د مشرتابه د فرمان په اساس له علماوو سره تر مشورې وروسته په یاد هر ولایت کې د نوې جوړې شوې محکمې لپاره دوه ــ دوه جید علماء کرام د قاضي او مفتي محرر په توګه انتخاب کړل.
نوموړي د یادو ولایتونو د محاکمو د ښه انسجام لپاره اړوند مسوولینو ته لازمې توصیې وکړې او د موضوعاتو د حل او فصل په باره کې یې د شرعي اساساتو پر بنا د عاجلو اقداماتو غوښتنه وکړه.
په دې سربېره د سترې محکمې د اداري معاون په مشرۍ دغه پلاوي له د ولایتي محاکمو مسؤولینو ته سپارښتنه وکړه چې له مراجعینو سره ښه او بېطرفه چلند وکړي، د امنیت د لا ښه ټینګښت په برخه کې لازم تدابیر ونیول شول او د تعمیراتو تخنیکي وسایلو او انتقالي وسایلو په اړه معلومات ترلاسه شول.
باید وویل شي چې د اسلامي امارت د مشرتابه د حکم له مخې چې د سترې محکمې د عالي مقام لخوا تصویب شوی، د هیواد ډېری ولایتونو ته د محاکمو نوي تشکیلونه انتخاب شول، چې په هر ولایت کې به دوه باصلاحیته متدین، امانتداره او ښه سابقه لرونکي جید علماء کرام ټاکل کېږي، تر څو د تېرې ادارې پر مهال شوې پرېکړې د شریعت په رڼا کې تر ښه غورلاندې ونیسي، که د شریعت د اصولو خلاف وې نقض او که د تایید وړ وې تایید یې کړي، له یادو دوو کسانو یو به د قاضي او دویم به د مفتي محرر په حیث ټاکل کېږي.
