د هالند له نوي سفیر سره د قاضي القضات لیدنه
هالند له نوي سفیر سره د قاضي القضات لیدنه د سترې محکمې رییس او قاضي القضات قانونپوه سیدیوسف حلیم نن تر غرمې مخکې په افغانستان کې د هالنډ هیواد له سفیرې میرمن سیسیلیا ویجرس سره وکتل. په دغه کتنه کې لومړی د هالنډ هیواد سفیرې د قانون، د قانون واکمنۍ او بشري حقوقو د تامین او د رسمي او نارسمي عدالت ترمنځ د اړیکو پر څرنګوالي باندې خبرې او په یادو برخو کې د خپل متبوع هیواد د همکاریو د څرګندولو ترڅنګ یې، هیله وکړه چې د افغانستان قضايي نظام او جوړښت په اړه معلومات ترلاسه او شریک کړي. ورپسې قاضي القضات میرمن سیسیلیاویجرس ته په افغانستان کې د هالنډ هیواد د سفیر په توګه نوې دندې مبارکي ورکړه او د افغانستان د قضايي سیستم او قانون، د قانون د واکمنۍ او عدالت او قضايي خپلواکۍ د ژمنتیا په اړه چې د امنیت او ټیکاو متضمن دی، خبرې اترې وکړې زیاته یې کړه چې د قضايي عدالت او قانون د واکمنۍ د پلیتابه بهیر د قضايي نظام له واجباتو څخه دی او ستره محکمه ژمنه ده چې د قضایه قوې د عمل برنامې په ملي لومړیتوبونو کې د شاملو پروګرامونو په پلیتابه او په جینوا نړیوال کنفرانس کې د افغان دولت ژمنتیاوو پر بنسټ لازم قضايي، اداري او له اداري فساد سره د مبارزې په برخه کې لازمو سمونونو ته د قانون د واکمنۍ په موخه دوام ورکړي د ښو قضايي خدماتو د ارایې او عدالت ته د خلکو د اسانه لاسرسي لارې چارې چمتو او په دې برخه کې د نړیوالې ټولنې په ځانګړې توګه هالنډ له مرستو څخه چې د لټفا برنامه کې د عدلي او قضايي سکتور د برنامې همغږیکوونکی رول په غاړه لري، قدردانی او ښه راغلاست ووایه. په دغه کتنه کې دواړو لوریو د قضایه قوې د عمل برنامې د پلیتابه پر وړاندې د په مخ کې پرتو ګواښونو او ستونزو او د عدلي او قضايي ارګانونو ترمنځ په اړیکو او همغږۍ، او دغه شان په ذیعلاقه موضوعاتو باندې خبرې اترې وکړې.
