د قضایه قوې له لوري د ملي بیرغ د ورځې لمانځنه
د زمري میاشتې د اوومې او د بیرغ ملي ورځې د لمانځنې په پار، نن سهار مهال د یو لړ ځانګړو مراسمو په ترڅ کې د بیرغ ملي ورځ د سترې محکمې په چاپيریال کې ولمانځل شوه.
په دغو مراسمو کې چې د سترې محکمې رییس او قاضي القضات قانونپوه سیدیوسف حلیم، د سترې محکمې د عالي شورا غړو او مرکزي اداراتو رییسانو په کې ګډون درلود، لومړی د قضایه قوې قضاتو د ساتنې د عمومي قومندانۍ د تشریفاتو قطعې لازم تشریفات ترسره کړل او وروسته د سترې محکمې رییس او قاضي القضات، د هیواد ملي بیرغ چې زموږ د ولس د ملي او سیاسي هویت ښکارندوی دی، د سترې محکمې په چاپيریال کې پورته کړ او د خدای ج له درباره یې د ملي بیرغ عزت، په ګران هیواد کې د سولې، ثبات او سکون د ټینګښت لپاره د خدای ج دربار ته لاسونه لپه کړل.
