د هرات زون د نظامي محاکمو امنیتي او اجرائیوي قوماندانۍ لپاره نوی قوماندان معرفي او رسمًا یې دنده پیل کړه
د سترې محکمې د امنیتي او اجرائیوي چارو عمومي ریاست د نظامي محاکمو د امنیتي او اجرائیوي قطعاتو عمومي قوماندانۍ اړوند د شپږم زون (هرات) نظامي محاکمو امنیتي او اجرائیوي قوماندانۍ نوی ټاکل شوی قوماندان، قاري شهاب الدین (دلاور)، د روان ۱۴۴۸هـ ق کال د ربیع الآخر میاشتې په ۱۷مه نېټه اړوندو مسئولینو او منسوبینو ته معرفي او رسماً یې خپله دنده پیل کړه.
د نوموړي د معرفت غونډه، چې د سترې محکمې امنیتي او اجرائیوي چارو ریاست د نظامي محاکمو امنیتي او اجرائیوي قطعاتو عمومي قوماندان الحاج حافظ حکمت الله آغا (ذهین)، د هرات زون د نظامي محکمې رئیس الحاج شیخ عبدالغفار (رحماني) او نورو مسئولینو او منسوبینو په کې ګډون درلود، د قرآنکریم د مبارکو آیاتونو په تلاوت پیل شوه.
د هرات زون د نظامي محکمې رئیس د یادې ناستې ګډونوالو ته د وینا پر مهال وویل، چې اطاعت د اسلامي نظام د نظم، یووالي او ثبات له مهمو بنسټونو څخه دی.
د هغه په وینا، د مسئولینو او مشرانو هدایات او لارښوونې باید په اخلاص، صداقت او مسئولیتپذیرۍ سره عملي شي؛ ځکه د ادارې د چارو ښه تنظیم او د ټاکل شویو موخو ترلاسه کول د منظم اطاعت او همغږۍ له لارې ممکن دي.
همدارنګه نوموړي ټینګار وکړ، چې اطاعت باید د شرعي اصولو، قانوني چوکاټ او ټاکل شویو دندو په رڼا کې ترسره شي.
دغه راز د نظامي محاکمو امنیتي او اجرائیوي قطعاتو عمومي قوماندان الحاج حافظ حکمت الله آغا (ذهین) د ناستې ګډونوالو ته د وینا پر مهال له ټولو مسئولینو او منسوبینو وغوښتل، چې له نوي ټاکل شوي قوماندان سره د چارو په بهبود کې پوره همکاري وکړي.
د یادونې وړ ده، چې قاري شهاب الدین (دلاور) تر دې مخکې د نظامي محاکمو د امنیتي او اجرائیوي قطعاتو عمومي قوماندانۍ اړوند د بلخ زون د قوماندان په توګه دنده ترسره کوله.
غونډه د دعاء په ویلو پای ته ورسېده.
