د کابل ولایت مرافعه محکمې په ریاست کې د حرفوي او سازمانیافته سوالګرو دوسيو ته د رسېدنې په اړه د همغږۍ غونډه وشوه
د کابل ولایت د مرافعه محکمې مرستیال مفتي محمد مبین (الطاف)؛ په خپل کاري دفتر کې د کورنیو چارو وزارت د نشهیي توکو پر وړاندې د مبارزې معینیت د ملکي چارو له مرستیال مولوي عبدالرحمن (قاسمي)، محمد کبیر (ابراهیمخېل) او د کابل ولایت د سوالګرو راټولولو د هیئت له مسئول ملا ضیاءالحق حاجي منور سره (د ۱۴۴۸هـ ق کال د ربیع الآخر میاشتې په ۱۵مه) نېټه وکتل.
په دې لیدنه کې د حرفوي او سازمانیافته سوالګرو، له سوالګرۍ څخه د ناوړه استفادې کوونکو او هغو اړمنو او مستحقو کسانو د وضعیت په اړه، چې د ژوند د اړتیاوو له امله سوالګرۍ ته اړ شوي، هر اړخیز بحث او د نظرونو تبادله وشوه.
په پیل کې د کابل ولایت مرافعه محکمې د عمومي ریاست مرستیال راغلو محترمو مسئولینو ته د ښه راغلاست ترڅنګ د دوی له حضور څخه مننه وکړه او د سوالګرو د موضوع د منظم مدیریت او د اړوندو ادارو ترمنځ د لا زیاتې همغږۍ اړتیا یې څرګنده کړه.
وروسته مولوي عبدالرحمن قاسمي د سوالګرو د موضوع د څېړنې، تنظیم او د بېلابېلو ډلو د تشخیص په برخه کې تفصیلي معلومات وړاندې کړل، نوموړي په ځانګړې توګه د حرفوي او سازمانیافته سوالګرو، له سوالګرۍ څخه د استفاده کوونکو کسانو او رښتینو مستحقو او اړمنو سوالګرو ترمنځ د تفکیک، د هغوی د وضعیت د ارزونې او د موضوع د اصولي، قانوني، قضائي او مؤثر مدیریت په اړه خپل وړاندیزونه او لیدلوری شریک کړ.
د غونډې په دوام د مرافعه محکمې مرستیال د اړوندو مسئولینو او همکارو ادارو هڅې او کوښښونه وستایل او څرګنده یې کړه، چې د دې موضوع د سم مدیریت لپاره د قانوني، شرعي، قضائي او ټولنیزو موازینو په پام کې نیول، د اړمنو کسانو د حقونو رعایت او د حرفوي او سازمانیافته سوالګرۍ د مخنیوي ترمنځ مناسب توازن رامنځته کول اړین دي.
نوموړي همدارنګه د شریکو شویو وړاندیزونو په اړه د مرافعه محکمې د عمومي ریاست له لوري د هر اړخیزې همکارۍ او لازمې همغږۍ ډاډ ورکړ او وویل، چې د یادې موضوع د ښه تنظیم او د اړوندو قضایاوو د اصولي حل په برخه کې به د قانون په چوکاټ کې لازمه همکاري ترسره کېږي.
په پای کې ګډونوالو د موضوع د لا ښه تعقیب، د اړوندو ادارو ترمنځ د همغږۍ د پیاوړتیا او د وړاندې شویو وړاندیزونو د عملي کېدو په اړه د ګډو هڅو پر دوام ټینګار وکړ.
غونډه د دعاء په ویلو پای ته ورسېده.
